Kiberqáwipsizlikti támiyinlew, málimleme resursların qorǵaw hám internet tarmaǵınan qáwipsiz paydalanıw mádeniyatın arttırıw maqsetinde Ózbekstan kásiplik awqamları Federaciyası Qaraqalpaqstan Keńesiniń májilisler zalında jas xızmetkerlerdiń qatnasıwında kiberqáwipsizlik temasında seminar shólkemlestirildi. Onda Qaraqalpaqstan Respublikası Ishki isler ministrligi Kiberjınayatlarǵa qarsı gúresiw basqarması kiberprofilaktika inspektorı, kapitan T.Zaripov qatnasıp, búgingi kúnde internet tarmaǵında keńnen tarqalıp atırǵan kiberqáuipler hám olardıń aldın alıw ilajları haqqında maǵlıwmat berdi.

Seminar dawamında qatnasıwshılarǵa internet aldawshılıq, fishing hújimleri hám jeke maǵlıwmatlardıń tarqalıp ketiwine baylanıslı qáuip-qáterler túsindirildi. Sonday-aq, elektron pochta hám sociallıq tarmaqlardan paydalanıwda abaylılıq ilajlarına ámel etiw, quramalı parollerden paydalanıw, eki basqıshlı tastıyıqlawdı iske qosıw hám gúmanlı siltemelerdi ashpaw boyınsha ámeliy usınıslar berildi. Ilaj dawamında jas xızmetkerler ózlerin qızıqtırǵan sorawlarǵa juwap aldı.

Kiberqáuipsizlik qaǵıydalarına ámel etiw jeke maǵlıwmatlar hám sanlı qáwipsizlikti támiyinlewde úlken áhmiyetke iye ekeni ayrıqsha atap ótildi.

Seminar juwmaǵında málimleme qáuipsizligi tarawında bilim hám kónlikpelerdi turaqlı arttırıp barıw, kiberqáuiplerge qarsı sergeklikti kúsheytiw hám internet tarmaǵınan juwapkershilik penen paydalanıw zárúr ekenligi atap ótildi.