2026-jıl 11-iyun kúni Nókis qalasındaǵı 1-sanlı ulıwma bilim beriw mektebinde, mektep pitkeriwshileri ushın Oraylıq Aziyada birden-bir bilimlendiriw ornı esaplanǵan, Ózbekstan kásiplik awqamları Feleraciyasiniń Miynet hám sociallıq qatnasıqlar Akademiyası iskerligin úǵit-násiyatlaw ilaji, sonıń menen birge «Jaslar kúni» sheńberinde jaslarǵa biznes rejelerdi dúziw, grant hám investiciyalardı tartıw múmkinshilikleri boyınsha ámeliy seminar shólkemlestirildi.

Ilaj Ózbekstan kásiplik awqamları Federaciyasınıń Qaraqalpaqstan Keńesi tárepinen mektep pitkeriwshilerin aldaǵı tálim baǵdarların tańlawda qollap-quwatlaw, olardıń miynet huqıqıy sawatlılıǵın asırıw hámde isbilermenlikke qızıǵıwshılıǵın qollap-quwatlaw maqsetinde shólkemlestirildi.

Onda Akademiyanıń xızmetkerler bólimi baslıǵı X.Bazarboev, Federaciyanıń Qaraqalpaqstan Keńes baslıǵınıń jaslar máseleleri boyınsha másláhátshisi N.Aliev hám Sawda-sanaat palatası Qaraqalpaqstan Respublikası basqarması bas qánigesi S.Erjanovalar qatnastı.

Ilaj dawamında qatnasıwshılarǵa Akademiyada jaratılǵan tálim múmkinshilikleri, qabıllaw processleri, qánigelik baǵdarları hám de pitkeriwshiler ushın aldaǵı perspektivalar haqqında hár tárepleme maǵlıwmatlar berildi.

Sonıń menen birge, jaslarda isbilermenlik kónlikpelerin qáliplestiriw maqsetinde beznes rejelerdi dúziw boyınsha ámeliy túsinikler alıp barıldı. Ushırasıw qatnasıwshılarına biznes ideyanı qáliplestiriw, onı joybarlaw, finanslıq esap-kitaplardı ámelge asırıw hám óz iskerligin jolǵa qoyıwdıń dáslepki basqıshları haqqında usınıslar berildi.

Ilaj ashıq pikirlesiw formasında ótkerilip, pitkeriwshiler ózlerin qızıqtırǵan sorawlarına juwap aldı. Bunday ushırasıwlar jaslardıń sanalı kásip tańlawı, múnásip miynetke tayarlıǵı hám de keleshektegi jeke hám kásiplik rawajlanıwlarına xızmet etedi.