Hár bir puqaranıń múnásip hám barlıq qáwip-qáterlerden jıraq bolǵan sharayatlarda miynet etiwi, óziniń kásiplik jumısın qáterjam hám joqarı ónimdarlıq penen ámelge asırıwı tek ǵana onıń jeke hám shańaraqlıq abadanlıǵı emes, al pútkil mámlekettiń turaqlı ekonomikalıq ósiwi hám sociallıq rawajlanıwınıń tiykarǵı girewi bolıp esaplanadı. Sol sebepli de túrli tarawlarda miynet etip atırǵan jumısshı-xızmetkerlerdiń miynet qáwipsizligin támiyinlew, óndiris procesindegi túrli baxıcız hádiyseler hám kásiplik keselliklerdiń aldın alıw eń áhmietli wazıypalardan birine aylanǵan. Dúnya kóleminde hár jılı 28-aprel sánesiniń «Pútkil jer júzilik miynetti qorǵaw kúni» sıpatında belgileniwi de biykarǵa emes, álbette. Bul kún dúnya boylap iri korporaciyalardan baslap kishi kárxanalarǵa shekemgi barlıq strukturalardıń itibarın jumıs orınlarında salamat hám qáwipsiz ortalıqtı jaratıwǵa, miynet qáwipsizligi qaǵıydalarına qatań ámel etiwge qaratıw ushın berilgen áhmietli imkaniyat bolıp esaplanadı.

Taqıyatas rayonında da usı áhmiyetli sánege baǵıshlanǵan ilaj ótkerildi. Ilajda Ózbekstan bilimlendiriw hám ilim xızmetkerleri kásiplik awqamı Respublikalıq Keńesiniń Qaraqalpaqstan Respublikası boyınsha juwaplı shólkemlestiriwshisi R.Abdurahmanov qatnastı. Rayonda «Qáwipsiz miynet tiykarları» atamasında shólkemlestirilgen oqıw seminarınıń kiris bóliminde Ózbekstan bilimlendiriw hám ilim xızmetkerleri kásiplik awqamı Taqıyatas rayonlıq keńesiniń baslıǵı S.Bekimbetova shıǵıp sóylep, búgingi kúnde miynet nızamshılıǵı hám qáwipsizligi baǵdarında mámleketimiz tárepinen ámelge asırılıp atırǵan keń kólemli reformalar, xızmetkerlerdiń huqıqları menen nızamlı máplerin qorǵawda kásiplik awqamlarınıń roli haqqında hár tárepleme toqtap ótti.

Bunnan soń, Qaraqalpaqstan Respublikası Kámbaǵallıqtı qısqartıw hám bántlik ministrliginiń Mámleketlik miynet inspekciyası inspektorı M.Seydullaev, Ózbekstan kásiplik awqamları Federaciyasınıń Qaraqalpaqstan keńesi Miynet texnik inspektorı B.Utepbergenov, Qaraqalpaqstan Respublikası Kámbaǵallıqtı qısqartıw hám bántlik ministrliginiń Mámleketlik miynet huqıq inspektorı B.Asqarov, Ózbekstan kásiplik awqamları Federaciyası Qaraqalpaqstan Keńesiniń yuristi, bas qánige O.Urazbaevlar hár bir kárxana hám shólkemde qáwipsizlik sistemasın qanday etip huqıqıy hám texnikalıq jaqtan durıs, eń tiykarǵısı, nátiyjeli jolǵa qoyıw, jumıs orınlarındaǵı itimallı qáwip-qáterlerdi aldınnan bahalaw hám olardı jedel saplastırıwdıń zamanagóy usılları haqqında jıynalǵanlarǵa zárúr maǵlıwmatlardı usındı.

Seminardıń juwmaqlawshı bólimi óz-ara erkin sóylesiw, qızǵın pikir alısıw hám ashıq soraw-juwaplar ruwxında ótti. Májilis qatnasıwshıları, sonıń ishinde, shólkem basshıları hám miynetti qorǵaw wákilleri ózleriniń kúndelikli jumıslarında, óndiris processlerinde tikkeley dus kelip atırǵan hár qıylı mashqalalı jaǵdaylar, sheshimin kútip atırǵan qıyın máseleler jáne ózlerin qızıqtırǵan barlıq huqıqıy hám texnikalıq sorawlar menen taraw qániygelerine múrájat etti. Tarawdıń haqıyqıy bilimdanları bolǵan inspektor hám basshılar bolsa hár bir berilgen múrájatqa anıq hám tiykarlanǵan juwaplar berdi.

Bunday aǵartıwshılıq ilajlar miynetti qorǵaw baǵdarındaǵı bilim hám kónlikpelerdi bunnan bılay da bekkemlewge, jámiyette miynet mádeniyatın arttırıwǵa hám eń tiykarǵısı, hár bir jumıs ornında insan ómiri hám densawlıǵın isenimli saqlawday iygilikli hám ullı maqsetke xızmet etetuǵını sózsiz.