4-iyun kúni Ózbekstan bilimlendiriw hám ilim xızmetkerleri kásiplik awqamı Nókis qala bólimshesi keńesiniń esabat -saylaw konferenciyası bolıp ótti. Bul zárúrli ilaj qalalıq bilimlendiriw hám ilim tarawı xızmetkerleriniń social-ekonomikalıq máplerin qorǵaw, ótken dáwirdegi iskerligin esap-kitap etiw hám aldaǵı wazıypalardı belgilep alıwǵa qaratıldi.

Konferenciyaǵa Ózbekstan kásiplik awqamları Federaciyasınıń Qaraqalpaqstan keńesi baslıǵı U.Jalmenov, Ózbekstan bilimlendiriw hám ilim xızmetkerleri kásiplik awqamı Respublikalıq keńesiniń Qaraqalpaqstan Respublikası boyınsha juwaplı shólkemlestiriwshisi R.Abduraxmanov, baslanǵısh shólkemlerden saylaǵan 81 delegatlar hám de kásiplik awqamı belsendileri qatnastı.

Jıynalısta Ózbekstan bilimlendiriw hám ilim xızmetkerleri kásiplik awqamı Nókis qala bólimshesi keńesiniń  iskerligi, Tekseriw komissiyasınıń esabatı tıńlandı. Sonıń menen birge, keńes quramı aǵzaların, keńes baslıǵın, komitet quramın, Tekseriw komissiyası aǵzaları hám baslıǵın hám de qalalıq keńestiń joqarı kásiplik awqamı shólkemi konferenciyasına delegatlar kandidatların saylaw sıyaqlı zárúrli shólkemlestiriw máseleleri kórip shıǵıldı.

Dáslep, qalalıq bólimshe keńesi baslıǵı M.Daulbaev 2020-jıl avgust ayınan 2025-jıl may ayı aralıǵında bólimshe keńesi tárepinen ámelge asırılǵan jumıslar tuwralı konferenciya qatnasıwshılarına tolıq esabat berdi. Esabatda ótken dáwir dawamında xızmetkerlerdiń miynet huqıqların támiyinlew, mádeniy-aǵartıwshılıq ilajlar ótkeriw, sociallıq qorǵalıwın kúsheytiw boyınsha tabıs hám kemshilikler analiz etildi.

Sonıń menen birge, Tekseriw komissiyasınıń esabatı tıńlanıp, keńestiń 2020-jıl avgust ayınan 2025-jıl may ayı aralıǵında alıp barǵan jumıslarına baha berdi.

Keyininen sózge shıqqanlar qalalıq bólimshe keńesiniń 2020-jıl avgust ayınan 2025-jıl may ayı aralıǵında ámelge asırǵan jumısların talqılap, alıp barǵan jumısların “qanaatlandırarlı” dep bahaladı.

Konferenciyanıń eń áhmiyetli bólimi – qalalıq bólimshe keńesi baslıǵın saylaw boldı.

Nókis qalalıq bólimshesi keńesi baslıqlıǵına Qaraqalpaqstan Respublikası Mektepke shekemgi hám mektep bilimlendiriw ministrliginiń sektor qánigesi S.Jumaniyazov, bólimshe keńesiniń ámeldegi baslıǵı M.Daulbaev hám bólimshe qánigesi I.Rametovlardıń kandidaturaları kórsetildi. Delegatlar usınıs etilgen kandidaturalardı bir awızdan maqullap, saylaw byulletenine kirgizdi.

Keyingi bes jıllıq ushın qalalıq bólimshe keńesin basqarıw maqsetinde 81 delegat kórsetilgen kandidatlarǵa jasırın tárizde dawıs berdi. Sanaq komissiyası tárepinen dawıslar sanap shıǵılıp, nátiyjede M.Daulbaev kópshilik dawıs menen Ózbekstan bilimlendiriw hám ilim xızmetkerleri kásiplik awqamı Nókis qalalıq bólimshesi keńesi baslıǵı lawazımına qayta saylandı.

Sonıń menen birge, konferenciyada keńes aǵzaları, komitet quramı, Tekseriw komissiyası aǵzaları hám baslıǵı hám de joqarı turıwshı kásiplik awqamı konferenciyasına delegatlar saylandı.

Esabat-saylaw konferenciyası Ózbekstan bilimlendiriw hám ilim xızmetkerleri kásiplik awqamı Nókis qala bólimshesi ushın jańa dáwirdegi wazıypalardı belgilep, kelesi iskerlik baǵdarların anıqlap alıwda zárúrli áhmiyet iye.