Har bir fuqaroning munosib va barcha xavflardan holi bo‘lgan sharoitlarda mehnat qilishi, o‘z kasbiy faoliyatini xotirjamlik hamda yuqori unumdorlik bilan amalga oshirishi nafaqat uning shaxsiy va oilaviy farovonligi, balki butun mamlakatning barqaror iqtisodiy o‘sishi hamda ijtimoiy taraqqiyotining asosiy garovidir. Shu sababli ham turli sohalarda mehnat qilayotgan ishchi-xodimlarning mehnat muhofazasini ta’minlash, ishlab chiqarish jarayonidagi turli baxtsiz hodisalar va kasb kasalliklarining oldini olish eng dolzarb vazifalaridan biriga aylangan. Dunyo miqyosida har yili 28-aprel sanasining «Butunjahon mehnat muhofazasi kuni» sifatida nishonlanishi ham bejiz emas, albatta. Bu kun dunyo bo‘ylab yirik korporatsiyalardan tortib kichik korxonalargacha bo‘lgan barcha tuzilmalarning e’tiborini ish joylarida sog’lom va xavfsiz muhitni yaratishga, mehnat xavfsizligi qoidalariga qat’iy amal qilishga qaratish uchun berilgan muhim imkoniyatdir.

Taxiatosh tumanida ham ushbu muhim sanaga bag’ishlangan tadbir o‘tkazildi. Tadbirda O‘zbekiston ta’lim va fan xodimlari kasaba uyushmasi Respublika Kengashining Qoraqalpog’iston Respublikasi bo‘yicha mas’ul tashkilotchisi R.Abduraxmanov ishtirok etdi. Tumanda «Xavfsiz mehnat asoslari» mavzusida tashkil etilgan o‘quv seminarining kirish qismida O‘zbekiston ta’lim va fan xodimlari kasaba uyushmasi Taxiatosh tuman kengashi raisi S.Bekimbetova so‘zga chiqib, bugungi kunda mehnat qonunchiligi va xavfsizligi borasida davlatimiz tomonidan amalga oshirilayotgan keng ko‘lamli islohotlar, xodimlarning huquq va qonuniy manfaatlarini himoya qilishda kasaba uyushmalarining roli haqida atroflicha to‘xtalib o‘tdi.

Shundan so‘ng, O‘zbekiston kasaba uyushmalari Federatsiyasining Qoraqalpog’iston kengashi Mehnat texnik inspektori B.Utepbergenov, Qoraqalpog’iston Respublikasi Kambag’allikni qisqartirish va bandlik vazirligining Davlat mehnat inspektsiyasi inspektori M.Seydullaev, Qoraqalpog’iston Respublikasi Kambag’allikni qisqartirish va bandlik vazirligining Davlat mehnat huquq inspektori B.Askarov, O‘zbekiston kasaba uyushmalari Federatsiyasi Qoraqalpog’iston Kengashining yuristi, bosh mutaxassis O.Urazbaevlar so‘zga chiqib har bir korxona va tashkilotda xavfsizlik tizimini qanday qilib huquqiy va texnik jihatdan to‘g’ri, eng asosiysi, samarali yo‘lga qo‘yish, ish joylaridagi ehtimoliy xavf-xatarlarni oldindan baholash va ularni zudlik bilan bartaraf etishning zamonaviy usullari haqida yig’ilganlarga zarur ma’lumotlarni taqdim etdi.

Seminarning yakuniy qismi o‘zaro erkin muloqot, qizg’in fikr almashinuv va ochiq savol-javoblar ruhida o‘tdi. Yig’ilish ishtirokchilari, jumladan, tashkilot rahbarlari va mehnat muhofazasi vakillari o‘zlarining kundalik ish faoliyatida, ishlab chiqarish jarayonlarida bevosita duch kelayotgan turli muammoli vaziyatlar, echimini kutayotgan murakkab masalalar hamda o‘zlarini qiziqtirgan barcha huquqiy va texnik savollar bilan soha mutaxassislariga murojaat qildilar. Sohaning haqiqiy bilimdonlari bo‘lgan inspektor va rahbarlar esa har bir berilgan murojaatga aniq va asosli javoblar qaytardilar.

Bu kabi ma’rifiy tadbirlar mehnat muhofazasi yo‘nalishidagi bilim va ko‘nikmalarni yanada mustahkamlashga, jamiyatda mehnat madaniyatini yuksaltirishga va eng asosiysi, har bir ish joyida inson hayoti hamda sog’lig’ini ishonchli asrashdek ezgu va ulug’vor maqsadga xizmat qilishi shubhasizdir.