Búgingi kúnde Nókis qalasında “Turan” hám “Aral” balalardıń dem alıw hám sawallandırıw orayları oqıwshılardıń 2023-jılǵı jazǵı dem alıs waqıtların mazmunlı ótkeriw hám salamlastırıw maqsetinde óz jumısın alıp barmaqta. Házirgi waqıtta 4-gezekte hár bir orayda 90 baladan dem alıp atır.

Balalardıń dem alıw oraylarındaǵı waqtın mazmunlı ótkeriw maqsetindegi Ózbekstan kásiplik awkamları Federaciyasınıń Karaqalpaqstan Keńesi Atqarıw komitetiniń 2023-jıl 1-iyundaǵı 12-10 “s”-sanlı qararı, sonday-aq Balalardıń dem alıwı hám sawallandırılıwın shólkemlestiriw departamenti Qaraqalpaqstan Respublikası basqarmasınıń 2023-jıl 20-iyuldaǵı RM-01/50-sanlı xatı tiykarında Ózbekstan bilimlendiriw hám ilim xızmetkerleri kásiplik awqamı Nókis qalalıq bólimshesi keńesi atqarıw komiteti tárepinen “Turan” hám “Aral” balalardıń dem alıw hám sawallandırıw oraylarında 4-gezekte dem alıp atırǵan balalar arasında “Salamat bala-Watan tayanıshı» atamasında sporttıń shaxmat, shashka, stol tennisi, kishi futbol, basketbol túrleri boyınsha jarıslar shólkemlestirildi. Bul jarıstı ótkeriw ushın shólkemlestiriw komiteti dúzilip, jarıstı ádil alıp barıw ushın tóreshiler quramı qáliplestirildi. Sport jarıslarına hár bir oraydan sport túrleri boyınsha eń shaqqan hám epshil balalar sport túrleri boyınsha tańlap alınıp, jámi 52 bala qatnastı.

Jarıs juwmaqları boyınsha “Aral” balalardıń dem alıw hám sawallandırıw orayı komandası 1-orın, “Turan” balalardıń dem alıw hám sawallandırıw orayı komandası 2-orındı iyelep, shólkemlestiriwshiler tárepinen tayarlanǵan diplom, medal hám sawǵalar menen sıylıqlandı. Ótkerilgen jarıslar balalardıń yadında uzaq waqıt qalatuǵınday qızıqlı hám mazmunlı bolıp ótti.