Bugungi kunda Nukus shahridagi «Turan» va «Aral» bolalar dam olish va sog’lomlashtirish markazlari o’quvchilarning 2023-yildagi yozgi ta’til vaqtini mazmunli va maroqli o’tkazish, shuningdek sog’lomlashtirish maqsadida o’z ishlarini olib bormoqda. Hozirgi vaqtda 4-navbatda har bir oromgohda 90 boladan dam olmoqda.

Bolalarning oromgohdagi vaqtini mazmunli o’tkazish maqsadida O’zbekiston kasaba uyushmalari Federatsiyasining Qoraqalpog’iston Kengashi qo’mitasining 2023-yil 1-iyundagi 12-10 «s»-sonli qarori, shuningdek, bolalarning dam olishi va sog’lomlashtirilishini tashkillashtirish departamenti Qoraqalpog’iston Respublikasi boshqarmasining 2023-yil 20-iyuldagi RM-01/50-sonli xati asosida O’zbekiston ta’lim va fan xodimlari kasaba uyushmasi Nukus shahar bo’limi kengashi Ijroiya qo’mitasi tomonidan «Turan» va «Aral» bolalar dam olish va sog’lomlashtirish markazlarida 4-navbatda dam olayotgan bolalar orasida «Sog’lom bola-Vatan tayanchi» shiori ostida sportning shaxmat, shashka, stol tennisi, kichik futbol, basketbol turlari bo’yicha musobaqalar tashkil etildi.

Bu musobaqalarni o’tkazish uchun tashkiliy qo’mita tuzilib, musobaqalarni odilona o’tkazish uchun hay’at a’zolari saylandi. Sport musobaqalariga har bir markazdan sport turlari bo’yicha eng chaqqon va epchil bolalar tanlab olinib, jami 52 bola qatnashdi. O’tkazilgan musobaqalar yakuni bo’yicha «Aral» bolalar oromgohi komandasi 1-o’rin, «Turan» bolalar oromgohi komandasi 2-o’rinni egallab, tashkillashtiruvchilar tomonidan tayyorlangan diplom, medal va sovg’alar bilan taqdirlandi.

O’tkazilgan musobaqalar bolalarning yodida uzoq vaqt muhrlanib qoladigandek qiziqarli va maroqli o’tdi.