Бугунги кунда Нукус шаҳридаги «Туран» ва «Арал» болалар дам олиш ва соғломлаштириш марказлари ўқувчиларнинг 2023-йилдаги ёзги таътил вақтини мазмунли ва мароқли ўтказиш, шунингдек соғломлаштириш мақсадида ўз ишларини олиб бормоқда. Ҳозирги вақтда 4-навбатда ҳар бир оромгоҳда 90 боладан дам олмоқда.

Болаларнинг оромгоҳдаги вақтини мазмунли ўтказиш мақсадида Ўзбекистон касаба уюшмалари Федерациясининг Қорақалпоғистон Кенгаши қўмитасининг 2023-йил 1-июндаги 12-10 «с»-сонли қарори, шунингдек, болаларнинг дам олиши ва соғломлаштирилишини ташкиллаштириш департаменти Қорақалпоғистон Республикаси бошқармасининг 2023-йил 20-июльдаги РМ-01/50-сонли хати асосида Ўзбекистон таълим ва фан ходимлари касаба уюшмаси Нукус шаҳар бўлими кенгаши Ижроия қўмитаси томонидан «Туран» ва «Арал» болалар дам олиш ва соғломлаштириш марказларида 4-навбатда дам олаётган болалар орасида «Соғлом бола-Ватан таянчи» шиори остида спортнинг шахмат, шашка, стол тенниси, кичик футбол, баскетбол турлари бўйича мусобақалар ташкил этилди.

Бу мусобақаларни ўтказиш учун ташкилий қўмита тузилиб, мусобақаларни одилона ўтказиш учун ҳайъат аъзолари сайланди. Спорт мусобақаларига ҳар бир марказдан спорт турлари бўйича энг чаққон ва эпчил болалар танлаб олиниб, жами 52 бола қатнашди. Ўтказилган мусобақалар якуни бўйича «Арал» болалар оромгоҳи командаси 1-ўрин, «Туран» болалар оромгоҳи командаси 2-ўринни эгаллаб, ташкиллаштирувчилар томонидан тайёрланган диплом, медал ва совғалар билан тақдирланди.

Ўтказилган мусобақалар болаларнинг ёдида узоқ вақт муҳрланиб қоладигандек қизиқарли ва мароқли ўтди.