2025-jılı 18-iyul sánesinde Nókis qalasındaǵı «Aq quw» kompleksinde Ózbekstan kásiplik awqamları Federaciyasınıń Qaraqalpaqstan Keńesiniń VIII esabat-saylaw konferenciyası bolıp ótti.

Konferenciyaǵa Qaraqalpaqstan Respublikası Joqarǵı Keńesi baslıǵı Orınbaev Amanbay Tleubaevich, Ózbekstan Respublikası Oliy Majlisi senatı aǵzası, Ózbekstan kásiplik awqamları Federaciyası baslıǵı Rafiqov Qudratulla Mirsagatovich hámde bir qatar ministrlikler, basqarmalar wákilleri, konferenciyanıń 121 delegatları qatnastı.

Ótken esabat dáwiri dawamında kásiplik awqamları respublikamızdaǵı eń úlken puqaralıq jámiyet institutlarınıń biri sıpatında usı baǵdarda sociallıq sherikshilik principleri tiykarında jumıs alıp barıp úlken jetiskenliklerge eriskenligi, sonıń menen birge, kásiplik awqamları húkimetimizdiń eń jaqın birge islesiwshi hám isenimli sheriklesi sıpatında miynetkeshlerdiń sociallıq-ekonomikalıq máplerin qorǵawda, olardı hár tárepleme qollap-quwatlaw jumıslarında úlken úlesin qosıp kelgenligi haqqında sóz júritti.

Ilajda atap ótilgenindey, 2025-jıl kásiplik awqamları jumısında áhmietli basqısh bolıp, bıyıl keńestiń tek ǵana bes jıllıq jumısınıń juwmaǵı emes, al hárekettiń 120 jıllıǵı da keńnen belgilenbekte.

Konferenciyada Qaraqalpaqstan keńesiniń 2020-2025-jıllarǵa baylanıslı esabatı hám tekseriw komissiyasınıń jumısı haqqındaǵı esabatı da tıńlandı hám esabat dáwirindegi jumısları qanaatlandırarlı dep tabıldı, aldaǵı wazıypaları belgilep alındı.

Májilis dawamında, Delegatlar jasırın dawıs beriw jolı menen Qaraqalpaqstan Keńesiniń baslıǵı hám onıń orınbasarın sayladı.

Saylaw nátiyjelerine bola, Qaraqalpaqstan Keńesiniń baslıǵı lawazımına Ulıqbek Abilaevich Jalmenov hám onıń orınbasarı lawazımına Muratbay Quanıshbaevich Daniyarovlar hámde atqarıw komiteti, tekseriw komissiyasınıń aǵzaları hám baslıǵı saylandı.

Sonıń menen birge, Ózbekstan kásiplik awqamları Federaciyasınıń IX Qurıltayına delegatlar sayladı hám Bas keńes quramına wákillerin de tastıyıqladı.