1997-jıldan baslap Xalıqaralıq Miynet Shólkemi tárepinen 12-iyun “Pútkil dúnya júzilik balalar miynetine qarsı gúresiw kúni” dep járiyalanǵan.

Usı sáne múnásibeti menen Ózbekstan kásiplik awqamları Federaciyasınıń Qaraqalpaqstan Keńesi tárepinen Nókis qalasındaǵı «Aral» hám «Turan» balalar dem alıw orayında “Balalardı balalar miynetinen hár qashanǵıdanda kóbirek qorǵań!” súreni astında iláj ótkerilip, bunda dem alıwshı balalar menen Qaraqalpaqstan Keńesiniń miynetkeshlerdiń sociallıq-ekonomikalıq máplerin qorǵaw bólimi meńgeriwshisi P.Toremuratov, Ózbekstan mámleketlik mákemeler hám jámiyetlik xızmeti xızmetkerleri kásiplik awqamı Qaraqalpaqstan Keńesiniń baslıǵı orınbasarı S.Uteuliev hámde sporttıń awır atletika túri boyınsha Ózbekstan hám Qaraqalpaqstan Respublikası chempionı E.Jannazarovlar qatnastı.

Ótkerilgen ilájda shıǵıp sóylegenler, ózleriniń usı tabıslarına erisiwinde mámleketimizde bárshe sharayatlardıń jaratılǵanlıǵın, bunnan jaslarımız durıs paydalana biliwi, birinshi gezekte jaqsı oqıwı, udayı túrde sport penen shuǵıllanıwı, bos waqıtların durıs shólkemlestiriwi kerekligin hám bul baǵdarlaǵı jumıslarda ata-analar keń jámiyetshilik penen birgelikte jumıs alıp barıw zárúrligin  aytıp ótti.

Bunnan soń 12-iyun – “Pútkil dúnya júzilik balalar miynetine qarsı gúresiw kúni”ne baǵıshlanıp balalar arasında súwret salıw tańlawları, sporttıń shashka, stol tennisi túrlerinen jarıslar ótkerilip jeńimpazlarǵa Ózbekstan kásiplik awqamları Federaciyasınıń Qaraqalpaqstan Keńesi hám Ózbekstan mámleketlik mákemeler hám jámiyetlik xızmeti xızmetkerleri kásiplik awqamı Qaraqalpaqstan Keńesi tárepinen diplomlar hám estelik sawǵaları menen sıylıqlandı.

Sonday-aq “Balalardı balalar miynetinen hár qashanǵıdanda kóbirek qorǵań!” súrendi astında ilájlar hám Moynaq rayonındaǵı «Aq keme», Ellikqala rayonındaǵı «Aral balaları», Tórtkúl rayonındaǵı «Oq kabutar», Taxıyatas rayonındaǵı «Aydın jol» balalar dem alıw oraylarında ótkerildi.