Xalqımızda «Ustaz atańday ullı» degen hikmet biykarǵa aytılmaǵan. Olar pútkil ómirin, bilimi hám kewliniń kúshin jas áwladtıń tálim-tárbiyasına baǵıshlaǵan pidayı insanlar bolıp esaplanadı.

1-oktyabr – «Muǵallimler hám ustazlar kúni» bayramı múnásibet menen, sonday-aq «Kekselerge húrmet-jaslarǵa órnek» degen urandı ózinde jámlegen «Kekseler hápteligi» ilájı sheńberinde Ózbekstan bilimlendiriw hám ilim xızmetkerleri kásiplik awqamı Nókis qalalıq bólimshesi keńesi tárepinen iygilikli baslama ámelge asırıldı.

Kásiplik awqamınıń wákilleri bilimlendiriw mákemelerinde uzaq jıllar nátiyjeli miynet etip, óz kásibiniń sheber ieleri sıpatında mıńlaǵan shákirtlerge ustazlıq etken hám búgingi kúnde keksheyip atırǵan bir topar miynet veteranlarınıń shańaraqlarında boldı.

Ilaj dawamında otızdan aslam ustazlardıń halınan xabar alınıp, olarǵa bayram qutlıqlawı hám estelik sawǵaları tapsırıldı. Shın júrekten sáwbetlesiwler waqtında veteran oqıtıwshılar ózleriniń bay turmıslıq tájiriybeleri, ótmishtegi jarqın estelikleri menen ortaqlastı. Olardıń júzlerindegi minnetdarshılıq hám quwanısh sezimi ilaj shólkemlestiriwshilerine de ózgeshe jıllılıq baǵıshladı.

Bunday húrmet ilajları bilimlendiriw tarawınıń «altın fondı» bolǵan veteranlardı qádirlew, olardıń másláhátleri hám duwaların alıw jáne jas áwladtı kekse jastaǵılarǵa húrmet ruwxında tárbiyalawda úlken áhmietke iye. Kásiplik awqamınıń bul háreketleri ustazlarǵa bolǵan joqarı itibardıń ayqın kórinisi bolıp esaplanadı.