Usı jıldıń 4-noyabr kúni Qaraqalpaq mámleketlik universiteti mádeniyat sarayında «Jańa Ózbekstan – jańa kásiplik awqamları», «Kásiplik awqamları hám bilimlendiriw keshe hám búgin» atamasında Ashıq sáwbetlesiw bolıp ótti. Ilajdı Senator, Ózbekstan kásiplik awqamları Federaciyası baslıǵınıń orınbasarı, Ózbekstan kásiplik awqamları Federaciyasınıń Qaraqalpaqstan Keńesi baslıǵı Ulıqbek Abılaevich Jalmenov kiris sóz benen ashtı hám bilimlendiriw tarawı xızmetkerleri hámde bárshe kásiplik awqam pidayıların, xızmetkerlerin 11-noyabr «Kásiplik awqamları kúni» bayramı menen qutlıqladı.

Soń Ózbekstan kásiplik awqamları gimni jańradı.

U.Jalmenov ótken bir jıl ishinde Ózbekstan hám Qaraqalpaqstan Respublikaları kásiplik awkamları tárepinen ámelge asırılǵan jumıslarǵ keń toqtap ótti.

Ózbekstan bilimlendiriw hám ilim xızmetkerleri kásiplik awqamı respublikalıq keńesiniń Qaraqalpaqstan Respublikası boyınsha juwaplı shókemlestiriwshisi Rustam Abduraximovich Abduraxmanov sózge shıǵıp, ótken bir jıl ishinde bilimlendiriw tarawı kásiplik awqam shólkemleriniń tiyisli hákimshilikler menen birgelikte (Qaraqalpaqstan Respublikası xalıq bilimlendiriw ministrligi, Qaraqalpaqstan Respublikası mektepke shekemgi bilimlendiriw ministrligi, olardıń orınlardaǵı bólimleri) orınlanǵan jumıslar, ótkerilgen ilájlar haqqında qısqasha aytıp, qatnasıwshılardı bayram menen qızǵın qutlıqladı.

Sózge Qaraqalpaq mámleketlik universitetiniń 1-kurs studenti, «Meniń Prezidentim» tańlawında Ózekstan kóleminde ekinshi orındı iyelegen Sarıbaevaa Gulferuz shıǵıp kásiplik awqamlarınıń orınlap atırǵan islerine óz minnetdarshılıǵın bildirdi hám ánjuman qatnasıwщıların bayram menen qutlıqladı.

Náwbette kásiplik awqamlarında uzaq jıllar minsiz xızmet etken 5 pensiyadaǵı xızmetkerlerge estelik sawǵaları berildi. Onnan soń hár bir rayon, qaladan belsendilik penen xızmet etip atırǵan bir baslanǵısh kásiplik awqam shólkemi baslıqlarına Ózbekstan bilimlendiriw hám ilim xızmetkerleri kásiplik awqamı respublikalıq keńesiniń «Húrmet jarlıǵı» menen hám estelik sawǵaları tapsırıldı.

Náwbet soraw-juwaplarǵa jetip keldi. Taraw xızmetkerleri ózleriniń qızıqtırǵan sorawlarına juwaplar hám tarmaqtaǵı mashqalalardıń sheshiw jolları boyınsha túsinikler aldı.

Iláj sońında Berdaq atındaǵı Qaraqalpaq mámleketlik universitetiniń jámááti hám studentleriniń koncert baǵdarlaması ilaj qatnasıwshılarına usınıldı.