Ózbekstan Respublikası Prezidentiniń 2026-jıl 16-fevral kúngi PP-22-sanlı Pármanı menen tastıyıqlanǵan «Ózbekstan-2030» strategiyasınıń «Máhálleni rawajlandırıw hám jámiyetti jetilistiriw jılı»nda ámelge asırıwǵa baylanıslı mámleketlik baǵdarlama boyınsha ámeliy ilajlar rejesi»nde usı jılda áhmiyetli sociallıq-ekonomikalıq máselelerdi dodalaw ushın kásiplik awqamları belsendileri hám jumıs beriwshilerdiń Húkimet, basqarmalar wákilleri menen jámáátshilik esitiwlerdi shólkemlestirip barıw, onda miynetkeshlerdiń jumıs orınlarında ushrasıp atırǵan mashqalalar hám usınıslardı dodalaw arqalı sheshim tabıwǵa erisiw belgilengen.

Usı múnásibet penen 2026-jıl 21-avgust sánesinde Ózbekstan kásiplik awqamları Federaciyasınıń Qaraqalpaqstan keńesi májilisler zalında Qaraqalpaqstan kásiplik awqamları belsendileriniń Qaraqalpaqstan Respublikası Ministrler Keńesi, ministrlikler, basqarmalar wákilleri menen birgeliktegi «Miynet salasındaǵı zárúr áhmiyetke iye máseleler» temasında dógerek sáwbeti bolıp ótti.

Dógerek sáwbetti Ózbekstan kásiplik awqamları Federaciyasınıń Qaraqalpaqstan Keńesi baslıǵı Ulıqbek Jalmenov ashıp berdi hám alıp bardı.

Dógerek sáwbetiniń ótkeriliw baǵdarlaması tiykarında Miynetkeshlerdiń sociallıq-ekonomikalıq máplerin qorǵaw bólimi meńgeriwshisi P.Toremuratovtıń «Ózbekstan Respublikası mámleketlik ǵárezsizliginiń 35 jıllıǵı: «Jalǵız Watan, jalǵız xalıq bolıp, jańa ómir hám keleshek jaratamız!» atamasındaǵı bayanatı, Ekonomika hám qarjı ministrliginiń bólim baslıǵı D.Allaniyazovtıń «Byudjet shólkemlerde miynet haqı, sociallıq qorǵaw hámde miynetti qorǵaw jumısların qarjılandırıw máselelri» hámde Qaraqalpaqstan Respublikası Kámbaǵallıqtı qısqartıw hám bántlik ministrliginiń  miynet huqıq inspektori B.Dauletbaevtıń «Miynet salasındaǵı nızam ústinligin támiyinlew boyınsha mashqalalar hám sheshimler» haqqındaǵı bayanatları tıńlandı.

Bunnan soń kásiplik awqamları belsendileri, mákeme hám kárxanalar  tárepinen xalıqtıń bántligin támiynlew, olardıń miynet huqıqlarınıń kepilliklerin kúsheyttiriw, xızmet saparı pulların tólew máseleleri, sonday-aq, búgingi kúnde qurılıs, awıl xojalıǵı hám óndiris tarawlarında eń kóp ushırasatuǵın áhimiyetli mashqalalardan biri rásmiy emes bántlik hám miynet qatnasıqların miynet shártnaması menen rásmiylestirmey jumıs islew jaǵdayları, miynet shártnamasın rásmiylestirmey jumıs islep atırǵan puqaralardıń miynet haqı, miynet dem alısı, sociallıq qamsızlandırıw, pensiya stajı hám miynetti qorǵawǵa baylanıslı huqıqları menen kepilliklerin támiyinlewde ushırasıp atırǵan mashqalalar hámde olardıń aqıbetleri haqqında, “UzASBO” dástúrin Miynet kodeksi talaplarına maslastırıw boyınsha berilgen sorawlarǵa tiyisli ministrlik, basqarma hám shólkemlerdiń wákilleri óz juwap-usınısların berdi.

Sonday-aq miynet salasındaǵı zárúr áhmiyetke iye, sheshimin tabıw kerek bolǵan ayırım máseleler boyınsha tiyisli ministrlikler, shólkemler menen birgelikte jumıs alıp barıw kerekligi atap ótildi.

Ilajda 61 kásiplik awqamınıń belsendileri hám birge islesiwshi shólkemlerdiń wákilleri qatnastı.