Ózbekstan kásiplik awqamları Federaciyasınıń Qaraqalpaqstan Keńesi tárepinen Ózbekstanda kásiplik awqamları háreketiniń 120 jıllıǵı hám «11-noyabr – Ózbekstan kásiplik awqamları kúni» bayramı aldınan bir qatar ilajlar ótkerilmekte.

Usı jıldıń 3-noyabr kúni Ózbekstan kásiplik awqamları Federaciyasınıń Qaraqalpaqstan keńesi baslıǵı U.Jalmenov “Qońırat soda zavodı” hámde “Nukus SSP Texnopark” juwapkershiligi sheklengen jámiyetleriniń jumısshı-xızmetkerleri menen ushırastı hám xızmetkerlerdiń miynet sharayatları menen tanıstı.

Ushırasıwlarda kárxanalardıń jumısları tallandı, sonday-aq, jumıs beriwshi hám kásiplik awqamları arasındaǵı sociallıq sheriklikti bekkemlew, xızmetkerlerdiń huqıqları menen máplerin qorǵaw, miynet ortalıǵın jaqsılaw hám belsendi xızmetkerlerdi xoshametlew máseleleri dodalandı. Xızmetkerlerdiń huqıqları menen nızamlı máplerin támiyinlewde kásiplik awqamları áhmiyetli rol atqarıp atırǵanı ayrıqsha atap ótildi.

“Nukus SSP Texnopark” JShJda jumısshılar ushın jaratılǵan sharayatlar hám ámelge asırılıp atırǵan sociallıq baslamalar basqalarǵa úlgi sıpatında atap ótildi. Kárxanada 150 jumısshı turaqlı jumıs penen támiyinlengen bolıp, olardıń dáramatın arttırıw, qosımsha miynet dem alısların beriw, salamatlandırıw jumısların shólkemlestiriw hám belsendi xızmetkerlerdi materiallıq hám ruwxıy xoshametlew sisteması jolǵa qoyılǵan.

Sonday-aq, óndiris quwatlılıǵın keńeytiw sheńberinde 36 million evroǵa teń aralas talshıqtan jip iyiriw liniyası jumıs alıp barmaqta. Germaniyanıń “Truetzschler GmbH & Co.KG” hám Yaponiyanıń “Murata Machinery LTD” kompaniyalarınan keltirilgen zamanagóy úskeneler iske qosılǵan. Jańa toqıw cexınıń qurılısı da dawam etpekte, onıń bahası 18 million evro hám qurılıp atırǵan 11,5 mıń kvadrat metr maydannıń 50 payızı juwmaqlanǵan. Cex iske qosılsa, jáne 400 adam jumıs penen támiyinlenedi.

Joybar tolıq ámelge asırılǵannan soń, kárxana jılına 50 million dollarlıq ónim islep shıǵaradı, sonnan 15 million dolları eksportqa baǵdarlanadı, 1200 jańa jumıs ornı jaratıladı. Bul Qaraqalpaqstan sanaatınıń rawajlanıwına hám xalıqtıń turmıs dárejesin arttırıwǵa úlken úles qosadı.

Ushırasıw sońında miynette belsendi hám intalı jumısshı-xızmetkerlerge Kásiplik awqamlarınıń «Húrmet jarlıǵı» hám estelik sawǵaları tapsırıldı. Bunday ilajlar miynet jámáátlerinde sociallıq ortalıqtı bekkemlew, xızmetkerlerdiń miynetine itibar hám húrmetti arttırıwǵa xızmet etpekte.