Taxtakópir hám Qaraózek rayonlarında baslanǵısh kásiplik awqamı shólkemleri baslıqları qatnasıwında «Kásiplik awqamları baslanǵısh shólkem jumısların Ustav talapları tiykarında alıp barıw» temasında oqıw seminarları ótkerildi.

Seminarda Ózbekstan kásiplik awqamları Federaciyası baslıǵı orınbasarı, Qaraqalpaqstan Keńes baslıǵı Ulıqbek Jalmenov qatnastı.

Oqıw seminarlarınıń tiykarǵı maqseti — baslanǵısh kásiplik awqamları shólkemleri iskerligin Ustav talapları tiykarında nátiyjeli shólkemlestiriw, kásiplik awqamı aǵzalarınıń miynet huqıqlarınıń támiyinleniwi, social-ekonomikalıq máplerin qorǵaw boyınsha kásiplik awqam shólkemleri baslıqlarınıń bilim hám ámeliy kónlikpelerin arttırıwdan ibarat.

Seminarlarda baslanǵısh shólkemlerdiń wazıypaları, kásiplik awqamı jıynalısların shólkemlestiriw, saylanatuǵın organlar iskerligi, hújjetlerdi júritiw, aǵzalıqtı bekkemlew, miynet nızamshılıǵına ámel etiliwin támiyinlew hámde jumıs beriwshiler menen sociallıq sheriklikti rawajlandırıw máseleleri talqılandı.

Sonıń menen birge, qatnasıwshılarǵa Ustav talapların ámeliyatta tuwrı qollanıw, xızmetkerlerdiń huqıq hám nızamlı máplerin qorǵaw, baslanǵısh shólkemler iskerligin jánede jetilistiriw boyınsha ámeliy usınıslar berildi.

Seminarlar ashıq baylanıs hám soraw-juwaplar tiykarında ótkerilip, qatnasıwshılar ózlerin qızıqtırǵan sorawlarǵa qánigelerden tárepinen juwaplar aldı.

Bunday oqıw seminarlar miynetkeshlerdiń huqıq hám máplerin isenimli qorǵawda zárúrli áhmiyetke iye boladı.