Mámleketimizde jaratılǵan kúshli sociallıq qorǵaw nátiyjeleri  tiyqarında Ózbekstan kásiplik awqamları tárepinen xalıqtıń járdemge mútáj qatlamların, imkaniyatı sheklengen shaxslardı, ásirese, basqalardıń qarawına mútáj jalǵız baslı kekselerdi mánzilli sociallıq qorǵawın kúsheytiw maqsetinde anıq ilajlar ámelge asırılmaqta.

11-noyabr – Ózbekstan kásiplik awqamları kúni múnásibeti menen Ózbekstan kásiplik awqamları Federaciyasınıń Qaraqalpaqstan keńesi tárepinen 2022-jıl 2-15-noyabr kúnleri aralıǵında «Jańa Ózbekstanda el áziz, insan áziz!» ideyasın ózinde jámlegen qayır-saqawat ilajları ótkerilmekte.

Usı jıldıń 5-noyabr kúni Ózbekstan kásiplik awqamları Federaciyasınıń Qaraqalpaqstan keńesi xızmetkerleri, belsendeleri Taqıyatas rayonındaǵı “Balalar úyi”ndegi tarbiyalanıwshılardan xabar aldı.

Ilajda Ózbekstan kásiplik awqamları Federaciyasınıń Qaraqalpaqstan keńesi Shólkemlestiriw bólimi mengeriwshisi G.Ilmuradova qatnasıp, usı úyde tarbiyalanıwshılardıń hal-jaǵdayları menen tanıstı.

Sonıń menen birge, “Balalar úyi”niń tarbiyalanıwshıları ónermentlerdiń buyımları kórgizbesi qoyıldı, al háwesker jasawshılar atqarıwındaǵı qosıq hám taqımaqları bárshege bayram keypiyatın baǵıshladı.

Ilaj dawamında “Balalar úyi”ne Qaraqalpaqstan keńesi tárepinen 3 mln. swmlıq qáwenderlik járdemler kórsetildi.

Ósip kiyatırǵan jas áwlatdı qorǵaw, olarǵa qılınıp atırǵan hár qanday ǵamxorlıq elimizdiń rawajlanıwı ushın qoyılıp atırǵan bekkem tiregi bolıp esaplanadı. Ertengi kúnimiz iyelerine kórsetilip atırǵan itibar keleshekte olardıń Watanına sadıq, fizikalıq hám ruwxıy barkamol bolıp jetiwinde ahmiyetli faktorı bolıp esaplanadı.

Usınday ilajlar Ózbekstan kásiplik awqamları Federaciyasınıń buwındaǵı barlıq shólkemler tárepinen Ózbekstan Respublikasınıń bárshe walayatlarında ótkerilmekte.