Usı jıldıń 28-aprel kúni, Ózbekstan kásiplik awqamları Federaciyasınıń Qaraqalpaqstan Keńesi imaratında 28-aprel «Pútkil dúnya júzilik miynetti qorǵaw kúni»ne baǵıshlanǵan «Miynetti qorǵawdıń nátiyjeli mádeniyatın birgelikte sáwlelendiremiz» ataması astında keń túrde hám kóterińki tárizde is-ilajlar ótkerildi.

Is-ilajlar Ózbekstan kásiplik awqamları Federaciyası Qaraqalpaqstan Keńesiniń baslaması menen ótkerilgen bolıp, bul is-ilajda Qaraqalpaqstan Respublikası Bántlik hám miynet qatnasıqları ministrligi, Nókis qalalıq shıpakerlik-sociallıq ekspertiza, Oʼzagrosugʼurta AJ Qaraqalpaqstan Respublikası filialı hám Keńeske aǵza kárxana, shólkem xızmetkerleri qatnastı.

Is-ilajlardıń ashılıw máresimi, 2022-jıl 28-aprel kúni saat 10:00 de baslanǵan bolıp, is-ilaj qatnasıwshıları miynetti qorǵaw barısında paydalanılatuǵın kórgizbeli qurallar menen tanısıp bolǵan soń, Keńestiń májilisler zalında 28-aprel «Pútkil dúnya júzilik miynetti qorǵaw kúni»ne baǵıshlanǵan dógerek sáwbetine qatnastı.

Dógerek sáwbetiniń maqseti, miynetti qorǵaw salasında xızmetkerlerge qáwipsiz miynet shárayatların jaratıw, islep shıǵarıw menen baylanıslı bolǵan baxıtsız hádiyselerdiń aldın alıw, miynetti mayıp bolǵan yaki kásip keselligine shalınǵan shaxslardıń káspiy miynet etiw dárejesin belgilew hám miynetti qorǵawdıń nátiyjeli mádeniyatın sáwlelendiriwge úles qosıw kibi miynetti qorǵaw salasında hám turmıslıq áhmiyetke bolǵan jaǵdaylar boyınsha soraw-juwaplar hám pikir almasıwlarǵa bay tárizde bolıp ótti.

Dógerek sáwbetiniń juwmaǵında miynetti qorǵaw hám qáwipsizligi boyınsha jámáátlik qadaǵalawdıń Respublika kórik-tańlawı jeńimpazları qımbat bahalı sawǵalar hám diplomlar menen sıylıqlandı.

Sonday-aq, Ózbekstan kásiplik awqamları Federaciyası Qaraqalpaqstan Keńesi tárepinen 28-aprel «Pútkil dúnya júzilik miynetti qorǵaw kúni»ne baǵıshlanǵan «Miynetti qorǵawdıń nátiyjeli mádeniyatın birgelikte sáwlelendiremiz» ataması astında is-ilajlardıń hápteligi usı jıldıń 22-aprel kúni Qanlıkól rayonında, 25-aprel kúni Taqıyatas «JES» AJinde, 26-aprel kúni «Qaraqalpaq Elektr tarmaqları» AJinde, 27-aprel kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında, «Qońırat Soda zavodı» JShJinde hám 28-aprel kúni Ózbekstan kásiplik awqamları Federaciyası Qaraqalpaqstan Keńesinde ótkerildi.