Өзбекстан кәсиплик аўқамлары Федерациясының Қарақалпақстан Кеңеси ҳәм Өзбекстан Миллий Паралимпия комитети Қарақалпақстан бөлимилери биргеликте Нөкис қаласындағы Олимпия ҳәм миллий спорт түрлери бойынша Нөкис жоқары спорт шеберлиги мектебинде спорттың парапауэрлифтинг түри бойынша Қарақалпақстан Республикасы чемпионаты өткерилди.

Чемпионаттың ашылыў мәресиминде Өзбекстан кәсиплик аўқамлары Федерациясының Қарақалпақстан Кеңеси баслығы орынбасары М.Данияров ҳәм Өзбекстан Миллий Паралимпия комитетиниң Қарақалпақстан Республикасы бөлими атқарыўшы директоры И.Рузибаевлар сөзге шығып жарыс қатнасыўшыларын қутлықлап, елимизде спортқа қаратылып атырған итибарды айрықша айтып өтти. Жарыс қәниге ҳәм тренерлер қатнасыўында жақсы кейпиятта шөлкемлестирилди.

Чемпионатта қырықтан аслам параспортшылар қатнасты ҳәм олар арасында қызғын ҳәм өз-ара гүреслер болып өтти. Барлық қатнасыўшылар жарыста жеңимпаз болыў ушын жуўапкершилик пенен ҳәрекет етти.

Жарыс жуўмағында жеңимпазлықты қолға киргизген спортшыларға Өзбекстан кәсиплик аўқамлары Федерациясының Қарақалпақстан Кеңеси тәрепинен таярланған естелик саўғалар менен мүнасип сыйлықланды.