Өзбекстан Республикасы Президентиниң 2020-жыл 30-октябрьдеги «Саламат турмыс тәризин кең ен жайдырыў ҳәм ғалабалық спортты және де раўажландырыў ис-илажлары ҳаққында»ғы ПП-6099 санлы Пәрманында ғалабалық спортты раўажландырыў бойынша шаңарақлар, мийнет жәмәәтлеринде ҳәм аймақлар арасында спорт жарысларын удайы түрде өткерип барыў белгилеп берилген.

Усы ўазыйпалар шеңберинде медицина мәкемелери хызметкерлериниң физикалық белсендилигин асырыў, денсаўлықларын беккемлеў, олар арасында саламат турмыс тәризин үгит-нәсиятлаў ҳәм бул бағдарда алып барылып атырған жумыслардың нәтийжелилигин және де асырыў, Өзбекстан Республикасы денсаўлықты сақлаў министрлиги ҳәм Өзбекстан денсаўлықты сақлаў хызметкерлери кәсиплик аўқамы Республикалық кеңесиниң 2023-жыл 13-сентябрьдеги “Медицина мәкемелери хызметкерлери арасында “Денсаўлықты сақлаў министри кубоги-2023” спорт жарысларын шөлкемлестириў ҳаққында”ғы қоспа қарарының орынланыўын тәмийинлеў мақсетинде Қарақалпақстан Республикасы денсаўлықты сақлаў министрлиги ҳәм Өзбекстан денсаўлықты сақлаў хызметкерлери кәсиплик аўқамының Қарақалпақстан Республикасы кеңесиниң қоспа қарары тийкарында 2023-жылдың 28-сентябрь күни Нөкис қаласында жайласқан Нөкис Абу Али Ибн Сино атындағы жәмийетлик саламатлық техникумының спорт базасында медицина мәкемелери хызметкерлери арасында ”Денсаўлықты сақлаў министри кубоги-2023” спорт жарысының Қарақалпақстан Республикасы басқышы спорттың киши футбол, шашка, шахмат ҳәм стол тенниси түрлери  бойынша  өткерилди.

Спорт жарысының Қарақалпақстан Республикасы басқышында медицина мәкемелеринен 15 команда қурамында 230 дан аслам хызметкерлер қатнасты.

Жарыс жуўмағында ҳәр бир спорт түри бойынша жеңимпазлар Қарақалпақстан Республикасы денсаўлықты сақлаў министрлиги менен Өзбекстан денсаўлықты сақлаў хызметкерлери кәсиплик аўқамының Қарақалпақстан Республикасы Кеңесиниң биргеликтеги тийисли дәрежедеги дипломлары, медальлары ҳәм де баҳалы саўғалары менен сыйлықланды.