Ózbekstan kásiplik awqamları Federaciyasınıń Qaraqalpaqstan Keńesi hám Ózbekstan Milliy Paralimpiya komiteti Qaraqalpaqstan bólimileri birgelikte Nókis qalasındaǵı Olimpiya hám milliy sport túrleri boyınsha Nókis joqarı sport sheberligi mektebinde sporttıń parapauerlifting túri boyınsha Qaraqalpaqstan Respublikası chempionatı ótkerildi.

CHempionattıń ashılıw máresiminde Ózbekstan kásiplik awqamları Federaciyasınıń Qaraqalpaqstan Keńesi baslıǵı orınbasarı M.Daniyarov hám Ózbekstan Milliy Paralimpiya komitetiniń Qaraqalpaqstan Respublikası bólimi atqarıwshı direktorı I.Ruzibaevlar sózge shıǵıp jarıs qatnasıwshıların qutlıqlap, elimizde sportqa qaratılıp atırǵan itibardı ayrıqsha aytıp ótti. Jarıs qánige hám trenerler qatnasıwında jaqsı keypiyatta shólkemlestirildi.

CHempionatta qırıqtan aslam parasportshılar qatnastı hám olar arasında qızǵın hám óz-ara gúresler bolıp ótti. Barlıq qatnasıwshılar jarısta jeńimpaz bolıw ushın juwapkershilik penen háreket etti.

Jarıs juwmaǵında jeńimpazlıqtı qolǵa kirgizgen sportshılarǵa Ózbekstan kásiplik awqamları Federaciyasınıń Qaraqalpaqstan Keńesi tárepinen tayarlanǵan estelik sawǵalar menen múnasip sıylıqlandı.