Nókis qalalıq mektepke shekemgi hám mektep bilimlendiriw bólimine qaraslı ulıwma orta bilim beriw mektepleri hám ulıwma túrdegi mektepke shekemgi bilimlendiriw shólkemlerinde 21-oktyabr — “Ózbek tiline mámleketlik til biyligi berilgen kún” múnásibeti menen bayram ilajları bolıp ótti.

Bul ruwxıy-aǵartıwshılıq ilájları Ózbekstan bilimlendiriw hám ilim xızmetkerleri kásiplik awqamınıń Nókis qalalıq bólimshesi hám bilimlendiriw mákemleri basshıları menen birgelikte joqarı dárejede shólkemlestirildi. Bilimlendiriw mákemelerinde “Til-qálbimiz, maqtanıshımız, keleshegimiz”, “Ana tili-maqtanıshım” atamalarındaǵı keshelerde milliy qádiriyatlarımız hám ana tilimizdiń biybaha baylıǵı jırlandı.

Ilajdıń tiykarǵı maqseti ósip kiyatırǵan jas áwlad qálbinde ana tilimizge, milliy ózligimizge hám mádeniy miyrasımızǵa sheksiz muhabbat jáne húrmet sezimlerin kamalǵa keltiriwden ibarat boldı. Orınlarda ótkerilgen ilájlarda shıǵıp sóylegenler ózbek tiliniń mámleketlik hám jámiyetlik turmıstaǵı ornı, onı qásterlep saqlaw hám rawajlandırıw hár bir puqaranıń, atap aytqanda, jas tárbiyalanıwshılardıń iygilikli minneti ekenin ayrıqsha atap ótti.

Iláj dawamında bilimlendiriw mákemelerindegi pedagog xızmetkerler, oqıwshılar tárepinen ana tilimizdi jırlaytuǵın tartımlı qosıqlar yadtan oqıldı, ullı alımlardıń shıǵarmalarınan úzindiler kórsetildi. Oqıwshılardıń atqarıwındaǵı ayaq oyınlar jıynalǵanlarǵa sheksiz zawıq baǵıshlap, mákemelerde haqıyqıy bayram keypiyatın qáliplestirdi.

Ilaj sońında pedagog xızmetkerler hám oqıwshılardıń belsene qatnasıwı, joqarı talantı hám ana tilimizge bolǵan qızǵın sadıqlıǵı barlıq qatnasıwshılarda maqtanısh sezimin oyattı.

Jas áwladtıń tárbiyası jolında jankúyerlik kórsetip kiyatırǵan pidayı ustaz hám tárbiyashılarǵa Ózbekstan bilimlendiriw hám ilim xızmetkerleri kásiplik awqamı Nókis qalalıq bólimshesi keńesi atınan minnetdarshılıq bildirilip, olardıń keleshektegi mashaqatlı hám maqtanıshlı jumıslarında tabıslar tiledi.