Insan qádirin arttırıw, miynetkeshlerdiń huqıq hám máplerin qorǵaw, olar ushın múnásip miynet sharayatların jaratıw mámleketimizde ámelge asırılıp atırǵan social siyasattıń joqarı turatuǵın baǵdarlarınan esaplanadı. Buǵan baylanıslı qurılıs salasında jumıs islep atırǵan xızmetkerlerdiń miynet huqıqların támiyinlew, qáwipsiz hám salamat miynet ortalıǵın qáliplestiriw hám de bántlikti rásmiylestiriwge qaratılǵan jumıslar izbe-iz dawam ettirilip atır. Ózbekstan kásiplik awqamları Federaciyası tárepinen tastıyıqlanǵan “Qurılıs salasında múnásip, qáwipsiz salamat miynet sharayatların jaratıw hám de bántlikti rásmiylestiriwge kómeklesiw” joybarı sheńberinde belgilengen ilajlar atqarılıwın támiyinlew maqsetinde orınlarda úyreniw jumısları alıp barılmaqta. Atap aytqanda, Ózbekstan transport, jol hám kapital qurılıs, qurılıs industriyası xızmetkerler kásiplik awqamı Respublika keńesiniń miyneti qorǵawı boyınsha bas qániygesi D. T. Xoshimova basshılıǵında tarmaq kásiplik awqamı Qaraqalpaqstan Respublikası bólimi baslıǵı G.T.Paluaniyazova qatnasıwında Nókis qalasında jaylasqan » TUPROQQALA MAXSUS QURILISh» JShJ de úyreniw jumısları alıp barıldı. Juwapkershiligi sheklengen jámiyetinde búgingi kúnde rásmiy 74 jumısshı miynet islep atır, sonnan 4 hayal kızlardı quraydı. Jámiyet basshısı Melishov Aybek Abatovich.

Jámiyet búgingi kúnde Nókis qalasındaǵı Respublika qániygelestirilgen onkologiya hám medicinalıq radiologiya ilimiy-ámeliy medicina orayı Qaraqalpaqstan filialı imaratın tazadan jumısların alıp barıp atır. Úyreniwler dawamında kárxanada miynet qatnasıqlarınıń nızamshılıq talapları tiykarında jolǵa qoyılǵanlıǵı, xızmetkerler menen miynet shártnamaları rásmiylestirgenligi, jumıs orınlarda miynet qáwipsizligi hám texnika qawipsizligi qaǵıydalarına ámel etiliwi jaǵdayı názerde tutılǵan.

Jumısshılardıń jeke qorǵaw quralları menen támiyinlengenligi, sanitariya-gigiena talaplarına ámel etiliwi hám de social-xojalıq sharayatlar úyrenildi. Úyreniw dawamında jumısshılar menen sáwbetlesildi hám kásiplik birlespeleri haqqında maǵlıwmatlar berildi. Ózlerin qızıqtırǵan sorawllarına juwaplar berildi. Sonıń menen birge buǵan baylanıslı alıp barılıp atırǵan jumıslar boyınsha Nokis qalasında jaylasqan «AJ Yatirim» JShJ XK, Qaraqalpaqstan Respublikası jollardan turaklı paydalanıw mámleketlik sholkemi, Nókis rayonı jollardan paydalanıw mámlektlik mekemesi iskerligi de úyrenildi.

Qurılıs tarawı joqarı juwapkershilik hám ayrıqsha itibar talap etetuǵın jónelislerden bolıp esaplanadı. Sol sebepli jumıs orınlarda qáwipsizlik qaǵıydalarına qatań ámel qılıw, miynet qáwipsizligi boyınsha ámeliy ilajlardı úzliksiz ótkerip barıw hám de xızmetkerlerdiń huqıqıy bilimlerin asırıw zárúrli áhmiyetke iye boladı. Buǵan baylanıslı kásiplik awqam  tárepinen jumıs beriwshi menen nátiyjeli baylanıs alıp barıp, jumıs beriwshiler menen social sheriklik qatnasıqların jáne de bekkemlew ilajları iske kѳrilmekte. Kásiplik birlespeleri tárepinen jumıs beriwshiler menen turaqlı baylanıs ornatıw, xızmetkerlerdiń huqıqıy sawatlılıǵın asırıw hám de jumıs beriwshiler menen social sheriklik qatnasıqların bekkemlew boyınsha jumıslar izbe-iz dawam ettirilip atır.