Bıyıl elimizde miynetkeshlerdiń haqıyqıy bayramı – kásiplik awqamları háreketiniń 120 jıllıǵı hámde 11-noyabr – Ózbekstan kásiplik awqamları kúni joqarı quwanısh hám kóterińki ruwxta belgilenbekte.

Prezidentimizdiń baslaması menen 2020-jılı qabıl etilgen nızamǵa muwapıq, 11-noyabr Kásiplik awqamları kúni dep belgilengen bolıp, derlik bes jıldan berli bul bayram elimizde keńnen belgilenip, miynetkeshlerdiń kewlinen tereń orın almaqta. Ol xalıqtıń mehir-muhabbatı, minnetdarshılıǵı hám miynetkeshlerge bolǵan húrmet belgisi boldı.

Ózbekstan kásiplik awqamları Federaciyasınıń Qaraqalpaqstan Keńesi tárepinen usı jıldıń 7-noyabr kúni Qaraqalpaq mámleketlik universitetinde Ózbekstanda kásiplik awqamları háreketiniń 120 jıllıǵı hám «11-noyabr – Ózbekstan kásiplik awqamları kúni» bayramına baǵıshlap kásiplik awqamları xızmetkerleri arasında sporttıń kishi futbol túri boyınsha “Ózbekstan kásiplik awqamıları Federaciyasınıń Qaraqalpaqstan Keńesi kubogi” sport jarısı ótkerildi.

Ilajda Ózbekstan kásiplik awqamları Federaciyasınıń Qaraqalpaqstan Keńesi baslıǵı U.Jalmenov, Ózbekstan kásiplik awqamları Federaciyasınıń Qaraqalpaqstan Keńesi baslıǵınıń orınbasarı M.Daniyarov, tarawlıq kásiplik awqamları Qaraqalpaqstan Respublikası Keńesi baslıqları, juwaplı shólkemlestiriwshileri qatnasıp, jarıs qatnasıwshılarına áwmetler tiledi.

Kún dawamında sport jarısı qızǵın ótip hám tájiriybeli tóreshiler tárepinen komandalıq esapta utıp shıqqan jeńimpazlardı anıqlandı.

Bunda: “Ózbekstan kásiplik awqamıları Federaciyasınıń Qaraqalpaqstan Keńesi kubogi” ushın ótkerilgen sport jarısında 3-orındı Ózbekstan Isbilermenlik, biznes hám sawda xızmetkerleri tarawlıq komandası, 2-orındı Ózbekstan Bilikmendiriw hám ilim xızmetkerleri tarawlıq komandası, 1-orındı Ózbekstan mámleketlik mekemeleri hám jámiyetlik xızmeti tarawlıq komandaları jeńimpaz dep tabıldı.

Komandalıq esapta jeńimpaz bolǵan Ózbekstan mámleketlik mekemeleri hám jámiyetlik xızmet kórsetiw tarawlıq komandasına “Kásiplik awqamı kubogi” hámde túrli nominaciyalar boyınsha, sonıń menen birge, jeńimpaz komandalarǵa diplomlar hám sawǵalar tapsırıldı.