Búgingi kúnde xızmetkerlerdiń huqıqları menen máplerin qorǵawda kásiplik awqamları áhmiyetli sociallıq institut sıpatında jumıs alıp barmaqta. Ásirese, jámáátlik shártnamalarınıń ámeliy turmıstaǵı ornı hám nátiyjeliligi artıp atırǵanı áyne haqıyqat.

Usı maqsette, Samarqant mámleketlik veterinariya medicinası, sharwashılıq hám biotexnologiyalar universiteti Nókis filialında «Kásiplik awqamınıń jumısında jámáátlik shártnamalardıń ornı, miynetti qorǵaw hám qáwipsizlik máseleleri» atamasında oqıw seminarı bolıp ótti.

Ilajdı Ózbekstan Agrosanaat kompleksi xızmetkerleri kásiplik awqamı Respublikalıq keńesiniń Qaraqalpaqstan Respublikası boyınsha juwaplı shólkemlestiriwshisi E.Seytnazarov ashıp berdi. Onda, Ózbekstan Agrosanaat kompleksi xızmetkerleri kásiplik awqamı Respublika keńesi baslıǵı orınbasarı Sh.Javlonov, Ózbekstan kásiplik awqamları Federaciyasınıń Qaraqalpaqstan Keńesiniń shólkemlestiriw jumısları bólimi meńgeriwshisi G.Ilmuradova, Ózbekstan kásiplik awqamları Federaciyasınıń Qaraqalpaqstan Keńesiniń miynetkeshlerdiń social-ekonomikalıq máplerin qorǵaw bólimi meńgeriwshisi P.Toremuratov, Ózbekstan kásiplik awqamları Federaciyasınıń Qaraqalpaqstan Keńesiniń texnik inspektorı B.Utepbergenov, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń jaslar máseleleri boyınsha direktor orınbasarı X.Abdijaliyev hám rayon (qala) keńesi baslıqları menen birgelikte jańadan saylanǵan baslanǵısh kásiplik awqam komiteti baslıqlarıda qatnastı.

Seminarda kásiplik awqamlarınıń jumısın shólkemlestiriw, xızmetkerlerdi sociallıq-ekonomikalıq qollap-quwatlaw hám miynetti qorǵaw boyınsha áhmiyetli maǵlıwmatlar berildi.

Sonday-aq, filial baslanǵısh kásiplik awqamınıń baslıǵı G.Kazaxbaeva óz tájiriybesi menen ortaqlasıp, hújjetlerin kórsetti. Ilaj qatnasıwshılar ushın paydalı hám ámeliy jaqtan nátiyjeli boldı.