Bizge belgili, Respublika boyınsha «Bes baslama olimpiadası» sheńberinde Mektepke shekemgi hám mektep bilimlendiriwi ministrligi sistemasındaǵı bilimlendiriw mákeme(mektep)leri xızmetkerleri arasında «Salamat denede – sapalı bilim» súreni astında Ózbekstan kásiplik awqamları Federaciyası kubogi sport jarısları bolıp ótpekte.

Ózbekstan Respublikası Prezidentiniń 2022-jıl 28-yanvardaǵı PF-60-sanlı Pármanı menen tastıyıqlanǵan «2022-2026-jıllarǵa mólsherlengen Jańa Ózbekstannıń rawajlanıw strategiyası»nıń 67-statyasında belgilengen wazıypalardı ámelge asırıw, denetárbiya hám sport ilajlarına keńnen qamtıw, olar arasında jarıslar shólkemlestiriw, sport infrastrukturasın jaqsılaw hám zárúr sport inventarları menen támiyinlew, xızmetkerlerdiń fizikalıq belsendilik dárejesin arttırıw, bilimlendiriw mákemelerindegi sport sekciyaları hám dógerekleriniń jumısın rawajlandırıwǵa kómeklesiw, oqıtıwshılardıń bos waqıtlarında sport penen shuǵıllanıw ushın sharayat jaratıw maqsetinde Ózbekstan kásiplik awqamları Federaciyası, Ózbekstan Respublikası mektepke shekemgi hám mektep bilimlendiriw ministrligi, Ózbekstan Respublikası Sport ministrligi hámde Ózbekstan jaslar isler agentligi tárepinen tastıyıqlanǵan qospa qararlarınıń orınlanıwın támiyinlew boyınsha Qaraqalpaqstan Respublikasında da sport jarısları dawam etpekte.

Ózbekstan bilimlendiriw hám ilim xızmetkerleri kásiplik awqamı rayon (qala)lıq bólimshe keńesleri hám juwapker shólkemler menen birgelikte «Salamat denede – sapalı bilim» súreni astında Mektepke shekemgi hám mektep bilimlendiriwi ministrligi sistemasındaǵı bilimlendiriw mákeme(mektep)leri xızmetkerleri arasında sporttıń futbol, voleybol, stol tennisi, shaxmat-shashka túrleri boyınsha sektorlar hám rayon (qala)lıq basqıshları bolıp ótti.

Bunda Qaraqalpaqstan Respublikası Mektepke shekemgi hám mektep bilimlendiriwi ministrligi sistemasındaǵı 701 bilimlendiriw mákeme (mektep)lerde birinshi sektor basqıshında 17018 xızmetker hám ekinshi rayon(qala) basqıshında 2202 xızmetkerdiń qatnasıwı támiyinlenip, jeńimpazlar Ózbekstan kásiplik awqamları tárepinen diplom hám sawǵalar menen sıylıqlandı. Hár bir sport túri boyınsha rayon(qala)da 1-orındı alǵan jeńimpaz(komanda)lar úshinshi juwmaqlawshı basqıshında qatnasıw huqıqın qolǵa kirgizdi.

Jarıstıń juwmaqlawshı Qaraqalpaqstan Respublikası final basqıshı usı jıldıń 7-may kúni bolıp ótedi.