28-aprel kúni, Berdaq atındaǵı Qaraqalpaq mámleketlik universitetinde Ózbekstan kásiplik awqamları Federaciyasınıń Qaraqalpaqstan Keńesi tárepinen «28-aprel-«Pútkil dúnya júzilik miynetti qorǵaw kúni»ne baǵıshlanǵan «Miynetti qorǵawdıń jańa basqıshı: jumıs ornında jasalma intellekt hám sanlastırıwdıń roli» ataması astında Dógerek sáwbeti ótkerildi.

Ilajda Ózbekstan kásiplik awqamları Federaciyası baslıǵınıń orınbasarı, Qaraqalpaqstan Keńesi baslıǵı U.Jalmenov, Ózbekstan kásiplik awqamları Federaciyasınıń Shólkemlestiriw bólimi meńgeriwshisiniń orınbasarı J.Ixtiyarov, Ózbekstan transport jol qurılıs, kurılıs industriyası xızmetkerleri kásiplik awqamı Respublika Keńesi baslıǵınıń orınbasarı B.Sultanov, Qaraqalpaqstan Respublikası Bántlik hám kambaǵallıqtı qısqartırıw ministrligi, Sanaat, radiaciya hám yadro qáwipsizligi komiteti Qaraqalpaqstan aymaqlıq bólimi, Bas shıpakerlik-sociallıq ekspertizası, Qaraqalpaqstan Respublikası Ayrıqsha jaǵdaylar basqarması wákilleri hámde kárxana, mákeme hám shólkem xızmetkerleri qatnastı.

Ilaj qatnasıwshıları miynetti qorǵaw barısında paydalanılatuǵın kórgizbeli qurallar menen tanıstırıldı.

Dógerek sáwbetiniń maqseti, miynetti qorǵaw salasında jasalma intellekt hám sanlastırıwdı sistemalı tárizde jolǵa qoyıw bolıp, jasalma intellekt bul insan miynetin jeńillestiriw, nátiyjelikti asırıw hám jańa imkaniyatlar jaratıwda áhmiyetli rol oynaydı.

Jasalma intellektten sistemalı tárizde paydalanǵan halda xızmetkerlerge qáwipsiz miynet shárayatların jaratıw, olardıń miynetin jeńillestiriw, óndiris  penen baylanıslı baxıtsız hádiyselerdiń aldın alıw kibi miynetti qorǵaw salasında hám turmıslıq áhmiyetke bolǵan jaǵdaylar boyınsha soraw-juwaplar hám pikir almasıwlarǵa bay tárizde bolıp ótti.

Negizi insandaǵı ullı intellekttiń miywesi bolǵan jasalma intellektten mámleketimizde de paydalanılmaqta. Buǵan mámleket xızmetlerin kórsetiwde jasalma intellektten paydalanıp atırǵanlıǵın mısal etip keltiriw múmkin.

Xalıqqa onlayn xızmetlerdi usınıw hám 24/7 rejiminde mámleket xızmetlerine baylanıslı sorawlarǵa juwap alıw imkaniyatların jaratıw boyınsha nátiyjeli isler alıp barılmaqta.

Dógerek sáwbetiniń juwmaǵında miynet qorǵawı hám qáwipsizligi boyınsha jámáátlik qadaǵalawın shólkemlestiriw boyınsha Respublika kórik-tańlawınıń Qaraqalpaqstan Respublikası basqıshında jeńimpaz bolǵanlar qımbat bahalı sawǵalar hám diplomlar menen sıylıqlandı.