Ózbekstanda hayal-qızlardıń jámiettegi ornı hám huqıqların bekkemlew, olardıń bilim hám qábiletin qollap-quwatlaw mámleketlik siyasattıń tiykarǵı baǵdarlarınan biri bolıp esaplanadı.

Haqıyqattan da Ózbekstanda bul baǵdarda kóplegen jumıslar qılınıp atır. Atap aytqanda “Ózbekstan -2030” startegiyası sheńberinde hayal-qızlardıń iskerligin asırıw, analıq hám balalıqtı qorǵaw, gender teńligin qarar taptırıw, hayallardıń huqıq hám máplerin támiyinlew boyınsha bir qansha ilajlar ámelge asırılmaqta.

Hayal-qızlardı hár tárepleme qollap-quwatlaw, olardı izzetlew, sonıń menen birge, barlıq tarawlarda nátiyjeli islep atırǵan hám shańaraqlar bekkemligin támiyinlewde óz úleslerin qosıp kiyatırǵan belsendi hayal-qızlardı xoshametlew, úlgili kásiplik mamnlıǵı menen basqalarǵa úlgi bolǵan miynet nuranıyların izzetlew sıyaqlı jumıslarda kásiplik awqamları tikkeley qatnasıp, iygilikli baslamalardı ámelge asırıwda mámleketimizge qol qanat bolıp atır.

2026-jıl 4-mart kúni Ózbekstan kásiplik awqamları Federaciyasınıń Qaraqalpaqstan Keńesi tarepinen 8-mart Xalıqaralıq hayal-qızlar kúni múnásibeti menen “Hayaldı qádirlew – jaqsılıq hám ádillik ólshemi» atamasında bayram keshesi bolıp ótti.

Onda respublikamızdıń qala hám rayonlarınan kelgen nuranıy analar, jámi­yetlik turmıstıń barlıq tarawlarında belsene qatnasıp kiyatırǵan hayal-qızlar, túrli ministrlik hám mákeme wákilleri qatnastı.

Ilajdı Ózbekstan kásiplik awqamları Federaciyası baslıǵınıń orınbasarı, Qaraqalpaqstan Keńesi baslıǵı U.Jalmenov ashtı hám qatnasıwshılardı bayram menen qızǵın qutlıqladı. U.Jalmenov óz sózinde Prezidentimiz Sh.Mirziyoev hayal-qızlarımızdıń salamatlıǵı bekkemlewge baylanıslı elimizde ámelge asırılp atırǵan reformalar, jámiyette óz ornın belgilewinde baslamaları ilgeri súrilgenligi sonıń menen birge mámleketimizde hayal-qızlar ushın kóplegen imkaniyatlar jaratıp berilgen, olar qaysı tarawda bolsa da ózleriniń miynet súygishligi, talapshańlıǵı arqasında erler menen teń qádem taslap atırǵanlıǵı haqqında aytıp ótti.

Bayram keshesi dawamında Watanımızdıń rawajlanıwı jolında jemisli miynet etip atırǵan, jámiyetlik turmıstıń barlıq tarawlarında pidákerlik kórsetip kiyatırǵan bir qatar hayal-qızlarǵa hám nuranıy anaları­mızǵa Ózbekstan kásiplik awqamları Federaciyasınıń Qaraqalpaqstan Keńesi tárepinen Húrmet jarlıǵı hám estelik saw­ǵalar menen sıylıqlandı.

Ilaj dawamında koncert baǵdarlaması hámmege kóterinki keypiyat baǵıshladı.