Ózbekstan kásiplik awqamları Federaciyasınıń Qaraqalpaqstan Keńesi májilisler zalında Den-sawlıqtı saqlaw xızmetkerleri kásiplik awqamı Qaraqalpaqstan Keńesi qarawındaǵı baslanǵısh kásiplik awqamları shólkemlerinde esabat-saylawlardı ótkeriw boyınsha seminar ótkerildi.

Seminarda Ózbekstan kásiplik awqamları Federaciyasınıń Qaraqalpaqstan Keńesi shólkemlestiriw jumısları bólimi meńgeriwshisi G.Ilmuradova tárepinen Ózbekstan kásiplik awqamları Federaciyasınıń Bas Keńes májilisi qararı menen tastıyıqlanǵan «Ózbekstan kásiplik awqamları Federaciyası quramındaǵı kásiplik awqam shólkemlerinde esabat-saylawlardı ótkeriw haqqında»ǵı Reje menen belgilep berilgen tártip tiykarında esabat-saylaw jıynalısları hám konferenciyaların talap dárejesinde ótkeriwdiń áhmiyeti haqqında, sonday-aq, Federaciya Ustavı, taraw Rejelerine qatań ámel etken halda ótkeriliwin támiyinlew, esabat-saylaw jıynalısların ótkeriw menen baylanıslı hújjetlerdi ornatılǵan tártipte durıs rásmiylestiriw boyınsha túsinikler berip ótildi.

Sonday-aq, esabat-saylaw konferenciyalarına tayarlıq kóriw, alıp barıw tártibi, baslanǵısh kásiplik awqam komiteti baslıǵı hám quramın saylaw, tekseriw komissiyası quramı hám baslıǵın saylaw, byulletenlerdi toltırıw, isshi organlardıń iskerligi, joqarı shólkem Konferenciyasına delegatlar hám wákillerdi saylaw tártipleri ámeliy tárizde kórsetip berildi.