Ózbekstan kásiplik awqamları Federaciyasınıń Qaraqalpaqstan Keńesi tárepinen Ózbekstan Respublikası Prezidentiniń 2019-jıl 30-iyuldaǵı PF-5775-sanlı Pármanı hámde Adam sawdasına hám májbúriy miynetke qarsı gúresiw” Milliy komissiyasınıń 2022-jıl 12-avgust kúngi 14-sanlı bayanlaması menen tastıyıqlanǵan “AQSh Mámleketlik departamentiniń “Adam sawdasına qarsı gúresiw” haqqındaǵı bayanatında keltirilgen usınıslardı ámeliyatqa en jaydırıw boyınsha is-ilájlar jobası”nıń 6-bántinde kórsetilgen paxta jıyın terim máwsiminde monitoring jumıslarında qatnasatuǵın mámleketlik emes, kommerciyalıq emes shólkemler wákilleri, puqaralıq jámiyeti belsendileri, ǵalaba xabar quralları hám blogerler ushın májbúriy miynet jaǵdayların anıqlaw hám bul processte belsendilerdiń qatnası hám háreketleri boyınsha 2022-jıl 06-sentyabr kúni Ózbekstan kásiplik awqamları Federaciyasının Qaraqalpaqstan Keńesi májlisler zalında “Adam sawdası hám májbúriy miynetke qarsı gúresiw” atamasında oqıw-seminar shólkemlestirildi.

Oqıw-seminarǵa Ózbekstan kásiplik awqamları Federaciyasınıń Qaraqalpaqstan Keńesi juwaplı xızmetkerleri, Qaraqalpaqstan Respublikası Prokuraturası, Qaraqalpaqstan Respublikası Ishki isler ministrligi, Qaraqalpaqstan Respublikası Bántlik hám miynet qatnasıqları ministrligi, Qaraqalpaqstan belsendi hayal-qızlar associaciyası, Qaraqalpaqstan nágiranlar jámiyetiniń Nókis qalalıq bólimshelerinen wákiller hámde ǵalaba xabar qural wákilleri hám blogerler qatnastı.

Oqıw-seminardı Ózbekstan Respublikası Oliy Majlisi Senatı aǵzası, Ózbekstan kásiplik awqamları Federaciyasınıń Qaraqalpaqstan Keńesi baslıǵı U.Jalmenov kiris sóz benen ashıp berdi.

Onnan soń, Qaraqalpaqstan Respublikası Bántlik hám miynet qatnasları ministrliginiń Bozataw rayonı Mámleketlik miynet huqıq inspektorı B.Dauletbaev “Májbúriy miynettiń aldın alıwda Xalıq aralıq hám milliy nızamshılıq normaları, májburiy miynet haqqında múrájáátlerdı kѳrip shıǵıw hám ayıpker shaxslardıń juwapkershiligi máseleleri haqqında” atamasında, «Kegeyli-Shımbay Agroklaster» JShJ baslıǵı J.Berdimuratovtıń “Paxta jıyın terimi máwsiminde terimshilerdi tartıw, miynet múnásibetleriniń júrgiziliwi (kelisim, shártnamalar dúziw, terim is haqısın tѳlew) táreplerdiń huqıq hám minnetleri, juwapkershiligi máseleleri haqqında” atamasında, Ózbekstan kásiplik awqamları Federaciyasınıń Qaraqalpaqstan Keńesiniń miynetti qorǵaw bóliminiń jetekshi qánigesi S.Orazımbetovtıń “Paxta jıyın terimi máwsiminde terimshilerdiń sanitariyalıq-texnikalıq qáwipsizigin támiyinlew, miynetti qorǵaw huqıqlarınıń buzılıwınıń aldın alıw, terimshiler ushın jaratılıwı lazım bolǵan sharayatlar haqqında” atamasındaǵı bayanatları menen qatnastı.

Oqıw-seminar juwmaǵında qatnasıwshılar óz-ara pikir almasıp hám ózlerin qızıqtırǵan sorawlarına juwaplar aldı.