Ózbekstan Respublikası Ministrler Kabineti, Ózbekstan kásiplik awqamları Federaciyası, Ózbekstan Jumıs beriwshiler konfederaciyası arasında sociallıq-ekonomikalıq máselelerge baylanıslı 2023-2025-jıllar ushın dúzilgen Bas Jámáátlik Kelisimniń 99-, sonday-aq Qaraqalpaqstan Respublikası Ministrler Keńesi, Ózbekstan kásiplik awqamları Federaciyasınıń Qaraqalpaqstan Keńesi hám Ózbekstan Sawda-sanaat palatasınıń Qaraqalpaqstan Respublikası basqarması arasındaǵı 2023-2025-jıllar ushın dúzilgen Aymaqlıq Jámáátlik Kelisimniń 105-bántlerine muwapıq respublikalıq kásiplik awqamları belsendileriniń Húkimet, ministrlik, basqarma, shólkemler wákilleri menen «Miynet salasındaǵı zárúr áhmiyetke iye máseleler» temasında dógerek sáwbetin ótkeriw belgilengen.

2024-jıl 10-dekabr kúni Ózbekstan kásiplik awqamları Federaciyasınıń Qaraqalpaqstan keńesi májilisler zalında ministrlikler, basqarma, shólkemler wákilleri menen birgeliktegi «Miynet salasındaǵı zárúr áhmiyetke iye máseleler» temasında dógerek sáwbeti bolıp ótti.

Dógerek sáwbetti Ózbekstan kásiplik awqamları Federaciyasınıń Qaraqalpaqstan Keńesi baslıǵı Ulıqbek Jalmenov ashıp berdi.

Dógerek sáwbetiniń ótkeriliw baǵdarlaması tiykarında Qaraqalpaqstan Respublikası Kámbaǵallıqtı qısqartıw hám bántlik ministrliginiń  miynet huqıq inspektori M.Qaljanovtıń «Miynet salasındaǵı nızam ústinligin támiyinlew boyınsha mashqalalar hám sheshimler», Qaraqalpaqstan Respublikası Ekonomika hám qarjı ministrliginiń sociallıq taraw ekonomikası hám mákemelerin finanslıq jaqtan támiyinlew bóliminin baslıǵı orınbasarı P.Allayarovtıń «Byudjet shólkemlerde miynet haqı, sociallıq qorǵaw hámde miynetti qorǵaw jumısların qarjılandırıw jumısları», Ózbekstan Sawda-sanaat palatasınıń Qaraqalpaqstan Respublikası basqarması baslıǵı orınbasarı A.Amanbaevtıń «Isbilermenlik subektlerin qollap-quwatlaw hámde jańa jumıs orınların jaratıw» haqqındaǵı bayanatlar tıńlandı.

Bunnan soń orınlardaǵı kásiplik awqamları belsendileri, mákeme hám kárxanalar xızmetkerlerinen bántlik, sociallıq-ekonomikalıq, huqıqıy qorǵaw, miynetti qorǵaw, miynet haqı hám napaqalardıń óz waqtında tóleniwi, xızmetkerlerdi beypul medicinalıq kórikten ótkeriw, jámiyetlik transportlar, miynetti qorǵaw jumısların qarjılandırıw hámde bilimlendiriw tarawlarında berilgen sorawlarǵa tiyisli ministrlik, basqarma hám shólkemlerdiń wákilleri óz juwap-usınısların berdi.

Sonday-aq miynet salasındaǵı zárúr áhmiyetke iye, sheshimin tabıw kerek bolǵan ayırım máseleler boyınsha tiyisli ministrlikler, shólkemler menen birgelikte jumıs alıp barıw kerekligi atap ótildi.