Mámleketimizde «11-noyabr – Ózbekstan kásiplik awqamları kúni» 2021-jıldan baslap, hár jılı keń belgilenip kelinbekte. Bayram ilajları barlıq buwındaǵı kásiplik awqamları shólkemleri basshılıǵında kárxana, mákeme hám shólkemlerde, sonday-aq, qalalıq, rayonlıq hámde Respublika kóleminde ótkerilmekte.

Bayram múnásibeti menen Ózbekstan kásiplik awqamları Federaciyası sistemasında túrli kórik-tańlawlar jeńimpazların, pidáyi miynetleri menen elimizdiń rawajlanıwına, kásiplik awqamları jumısların rawajlandırıwǵa múnásip úles qosıp kiyatırǵan hár túrli taraw xızmetkerlerin qádirlew hám sıylıqlaw dástúrge aylanǵan.

11-noyabr – Ózbekstan kásiplik awqamları kúni múnásibeti menen Ózbekstan kásiplik awqamları Federaciyasınıń Qaraqalpaqstan Keńesi tárepinen 2024-jıl 1-10 noyabr kúnleri aralıǵında «Insan qádiri ushın, el-jurt baxtı ushın!» ideyasın ózinde jámlegen qayır-saqawat ilajları ótkerilmekte.

Usı jıldıń 6-noyabr kúni Ózbekstan kásiplik awqamları Federaciyasınıń Qaraqalpaqstan Keńesi wákilleri hám kásiplik awqamları belsendeleri menen birgelikte Nókis qalası 10-sanlı «Nurlı mákan» mektep-internatıda bolıp, usı jerde tárbiyalanıp atırǵan balalar sonday-aq, jumısshı–xızmetkerleri menen ushırastı hámde mektep-internatınıń iskerligi menen tanıstı.

Ilajda Senator, Ózbekstan kásiplik awqamları Federaciyası baslıǵı orınbasarı, Ózbekstan kásiplik awqamları Federaciyasınıń Qaraqalpaqstan Keńesi baslıǵı U.Jalmenov qatnasıp, mektep-internatı tárbiyalaniwshıları hámde onda islewshi xızmetkerlerdiń hal-jaǵdayları menen tanısıp olar menen sáwbetlesti.

Mektep-internatı 200 orınǵa mólsherlengen bolıp, búgingi kúnde 250 oqıwshı hám 223 pedagog-oqıtıwshılar jumıs alıp barılmaqta.

Ushırasıw dawamında mektep-internatında islewshi aldınǵı qatardaǵı xızmetkerlerge Ózbekstan kásiplik awqamları Federaciyasınıń Qaraqalpaqstan Keńesiniń Húrmet jarlıǵı hámde oqıwshı balalarǵa baxalı sawǵalar berildi.