Hár bir jámiyettiń erteńgi kúngi rawajlanıwı oqıtıwshı hám ustazlardıń búgingi islep atırǵan miynetine baylanıslı. Watanımızdıń erteńgi kúni, jas áwladtı tárbiyalaw baǵdarındaǵı ustaz-muǵallim iskerligi sabır-shıdamlılıq hám mártlik úlgisi desek hasla qáte bolmaydı. Sebebi mektepke dáslepki qadem qoyǵan kishkene balaǵa birishi háriplerdi úyretiwden baslap onı el-jurt xızmetine jaraytuǵın jetik insan, óz kásibiniń ustası bolǵan jetik qánige dárejesine alıp shıǵıw ańsat jumıs emes. Buǵan kúnler, aylar, jıllar dawamındaǵı pidayı miynet arqalı ǵana erisiw múmkin.

Ózbekstan bilimlendiriw hám  ilim xızmetkerleri kásiplik awqamı Respublika keńesi kásiplik awqam aǵzalarınıń miynetine baylanıslı huqıq xám máplerin támiyinlew, miynet jámáátlerinde xızmetkerlerdi social-ekonomikalıq qollap-quwatlaw maqsetinde kásiplik awqamları  sistemasında keń kólemli is-ilájlar ámelge asırılmaqta.

Atap aytqanda, usı jıldıń 3-oktyabr kúni Ózbekstan bilimlendiriw hám  ilim xızmetkerleri kásiplik awqamı Respublika keńesi tárepinen Qaraqalpaqstan Respublikasınıń Nókis qalasında “Muǵallimler hám ustazlar kúni” bayramı múnásibeti menen shólkemlestirilen “Ustazlar-kásiplik awqamı dıqqat itibarında !” atamasında sıylıqlaw ilájı ótkizildi.

Qaraqalpaqstan Respublikasınıń barlıq qala hám rayonlarınıń mektepke shekemgi hám mektep bilimlendiriwi, joqarı bilimlendiriw mákemelerinen pedagog ustazlar hám tárbiyashılar hámde qala, rayonlardıń kásiplik awqam bólimshesi, baslanǵısh kásiplik awqam komitetleri baslıqları, belsendiler, uzaq  jıllar tarawda miynet etken ustazlar, xızmetkerler, bilimlendiriw pidayıları qatnastı.

Ilájdı Ózbekstan bilimlendiriw hám  ilim xızmetkerleri kásiplik awqamı Respublika keńesi baslıǵı R.Bedilov ashıp berdi hám elimizde alıp barılıp atırǵan keń kólemli reformalarda bilimlendiriwdińi ornı hám áhmiyeti, taraw xızmetkerlerine berilip atırǵan imkániyatlar haqqında pikirleri menen bólisti hám qatnasıwshılardı 1-oktyabr-“Muǵallim hám ustazlar kúni” bayramı menen qızǵın qutlıqladı.

Sonday-aq, Ózbekstan bilimlendiriw hám  ilim xızmetkerleri kásiplik awqamı Respublika keńesiniń Qaraqalpaqstan Respublikası boyınsha juwaplı shólkemlestiriwshisi R.Abduraxmanov bayram múnásibeti menen qatnasıwshılardı qutlıqladı.

Bunnan soń, Respublikadaǵı aldıńǵı tájiriybeli muǵallimler, mektepke shekemgi bilimlendiriw shólkemi tárbiyashıları, ustazlar hám texnik xızmetkerlerden 40 xızmetker Ózbekstan bilimlendiriw hám  ilim xızmetkerleri kásiplik awqamı Respublika keńesiniń qımbat bahalı estelik sawǵaları menen sıylıqlandı.

Iláj dawamında bir qatar muǵallim hám ustazlar olarǵa kórsetilip atırǵan húrmet hám itibardan hámde jıllı múnásibetten júdá minnetdar ekenin, bunday kóterińki keypiyat olarda jánede kúsh-ǵayrat penen islewge iytermelewi, jas áwladqa tálim beriwde qosımsha kúsh-quwat baǵıshlawın atap ótti.