Ózbekstan densawlıqtı saqlaw xızmetkerleri kásiplik awqamı Respubikalıq Keńesi tárepinen 9 may – «Eslew hám qádirlew kúni» bayramı múnásibeti menen xalıqtıń salamatlıǵı jolında ózleriniń ómirin ayamastan qurban bolǵan medicina xızmetkerlerin eske alıw, olardıń shańaraq aǵzalarınan xabar alıw, sonday-aq kóp jıllar dawamında usı salada pidákerlik penen miynet etken, házirde napaqada bolǵan miynet veteranları hám de taraw kásiplik awqamınıń belsendelerin qádirlew, olardıń miynetlerin keń jámiyetshilikke jetkeriwge qaratılǵan akciya ótkeriliwi jolǵa qoyılǵan.

Akciya sheńberinde usı jıldıń 6-may kúni Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası Keńesi tárepinen kóp jıllar dawamında densawlıqtı saqlaw tarawı xızmetkerleriniń sociallıq-ekonomikalıq hám miynet huqıqların qorǵawda miynet etken hám házirde napaqada bolǵan, sonday-aq ózleriniń tiykarǵı qánigeligi boyınsha jumıs islep atırǵan kásiplik awqam belsendileriniń miynetlerin atap ótiw hám qádirlew maqsetinde bayram ilajı ótkerildi.

Ótkerilgen bayram ilajına taraw mákemeleri kásiplik awqam komitetlerinde islep ketken kásiplik awqam belsendileri hám miynet veteranları mirát etildi.

Bayram ilajında sózge shıqqan Ózbekstan kásiplik awqamları Federaciyasınıń Qaraqalpaqstan Keńesi baslıǵınıń orınbasarı M.Daniyarov, Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası Keńesi baslıǵı L.Baybosınovalar kásiplik awqamı belsendilerin bayram menen qutlıqlap, olardıń kásiplik awqamlarındaǵı kóp jıllıq miynetlerin atap ótip, joqarı turıwshı kásiplik awqamları tárepinen olardıń etken miynetleri bahalaw maqsetinde alıp barılıp atırǵan jumıslar haqkında aytıp ótip, kásiplik awqam belsendilerine Ózbekstan densawlıqtı saqlaw xızmetkerleri kásiplik awqamı Respubikalıq Keńesi tárepinen tayarlanǵan 17 Qádirnamalardı, sonday-aq Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası Keńesi tárepinen tayarlanǵan bahalı sawǵalardı saltanatlı ráwishte tapsırdı.

Óz náwbetinde sózge shıqqan kásiplik awqam belsendileri kórsetilip atırǵan izzet-xúrmetke ózleriniń minnetdarshılıqların bildirip ótti.

Bayram ilajı sońında kásiplik awqam belmendilerine bayram dástúrxanı shólkemlestirildi.

Usı ilajlar menen bir qatarda orınlarda mákeme kásiplik awqam komitetleriniń jumıs beriwshiler menen birgelikte 9 may – «Eslew hám qádirlew kúni» bayramı múnásibeti menen Ózbekstan densawlıqtı saqlaw xızmetkerleri kásiplik awqamı Respublikalıq Keńesi tárepinen tayarlanǵan 72 Yadnama tarawda nátiyjeli jumıs islep, qaytıs bolǵan xızmetkerlerdiń shańaraq aǵzalarına, sonday-aq usı salada kóp jıllar islegen hám házirde napaqada bolǵan veteranlarǵa 115 Qádirnamalar, hám de kóp jıllar dawamında xızmetkerlerdiń sociallıq-ekonomikalıq hám miynet huqıqların qorǵap kelgen kásiplik awqam belsendilerine 12 Qádirnamalar hám Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası Keńesi tárepinen tayarlanǵan bahalı sawǵalar tapsırıldı.