Bul kún pútkil dúnya balaları ushın eń kewilli hám quwanıshlı bayram sanaladı. Álbette, balalar bul ómirdiń ajıralmas bólimi, balalar óz kúlkileri arqalı insanlar kewlinde turmısqa, jasawǵa bolǵan qızıǵıwshılıqtı payda etedi.

Dúnyada balalardıń kúlgisi hám shoqlıqlarınan da zawıqlı nárse bolmasa kerek. Olardıń aspanımız sıyaqlı ashıq kewillerine qaraǵan hár bir insan turmıs táshwishlerin umıtadı. Sebebi, perzentlerimizdiń kewilli hám baxıtlı demlerin hámiyshe kórip jasaw hár bir insan ómiriniń tiykarǵı mazmunı.

1 iyun–Xalıqaralıq balalardı qorǵaw kúni múnásibeti menen Qaraqalpaqstan Respublikası basshıları, Ózbekstan kásiplik awqamları Federaciyasınıń Qaraqalpaqstan Keńesi xızmetkerleri hámde belsendeleri Nókis qalasında jaylasqan «Imkon» reabilitaciya orayına iye mámleketlik kóp tarmaqlı qánigelestirilgen mektepke shekemgi bilimlendiriw shólkemindegi tárbiyalanıp atırǵan balalar halınan xabar aldı.

Ilajda Qaraqalpaqstan Respublikası Ministrler Keńesi baslıǵı F.Ermanov hámde Senator, Ózbekstan kásiplik awqamları Federaciyası baslıǵı orınbasarı, Ózbekstan kásiplik awqamları Federaciyasınıń Qaraqalpaqstan Keńesi baslıǵı U.Jalmenovlar qatnasıp, usı orayda tárbiyalaniwshı balalardı bayram menen qutlıqlap, olarǵa estelik sawǵalar berildi.

Ilaj oray tárbiyalaniwshıları atqarıwındaǵı saxnalıq kórinisleri menen dawam etti.

Xalıqaralıq balalardı qorǵaw kúni múnásibeti menen rejelestirilgen ilajlar Respublikamız boylap dawam etpekte.