Prezidentimizdiń basshılıǵında búgingi kúnde elimizde hayal-qızlarǵa ǵamqorlıq kórsetiw, olardı hár tárepleme qollap-quwatlaw, siyasiy, sociallıq-ekonomikalıq turmıstaǵı belsendiligin arttırıwǵa ayrıqsha itibar qaratılmaqta. Mámleketimizde gender teńligin támiyinlew, hayal-qızlardı jámiyetimizdiń barlıq tarawlarında ózleriniń qábiletin kórsetiwine keń múmkinshilik ashıp beriw, olardı kásip-ónerge, isbilermenlikke úyretiw, sociallıq qorǵawǵa mútáj hayal-qızlarǵai járdem kórsetiw maqsetinde «Hayallar dápteri»n engiziw, joqarı oqıw orınlarında bilim alıp atırǵan qızlardıń shártnama tólemlerin tólep beriw, pidayı, talantlı qızlardıń miynetin ılayıqlı bahalaw sıyaqlı bir qatar jumıslardıń ámelge asırılıp atırǵanı analarımızǵa, apa-qarındaslarımızǵa, dilbar qızlarımızǵa kórsetilip atırǵan ayrıqsha itibar jáne ǵamqorlıqtıń ayqın úlgisi bolıp tabıladı.

Hayal-qızlardı hár tárepleme qollap-quwatlaw, olardı qádirlew hámde shańaraqlardı bekkemlew, sonday-aq jas áwladtı milliy qádiriyatlarımızdı húrmet etiw ruwxında tárbiyalawdaǵı rolin hám sociallıq belsendiligin asırıw, sonıń menen birge barlıq tarawlarda nátiyjeli miynet etip atırǵan belsendi hayal-qızlardı xoshametlew, úlgili kásiplik maqtanıshı menen birge órnek bolǵan miynet veteranların qádirlep-qásterlew jumıslarında kásiplik awqamları da belsene qatnaspaqta.

Jámáátlik kelisimleri hám shártnamaları arqalı mámleketlik baǵdarlaması tiykarında, “Kásiplik awqamları-hayal-qızlarǵa” akciyası sheńberinde 4107 hayal-qızlarǵa sawǵalar tapsırıldı.

“Ózbekstan boylap sayaxat et!” ishki turizmdi rawajlandırıw dástúri tiykarında Qaraqalpaqstandaǵı dıqqatqa ılayıq orınlarǵa 1 mıń 500 ge jaqın, Samarqand, Buxara, Xiua qalalarına 1 mıńnan zıyat islewshi hayal-qızlardıń sayaxatları shólkemlestirildi.

2023-jıl 5-mart kúni Ózbekstan kásiplik awqamları Federaciyasınıń Qaraqalpaqstan Keńesi tarepinen 8-mart Xalıqaralıq hayal-qızlar kúni múnásibeti menen «Ómirdiń mazmunısız áziz analar» atamasında bayram keshesi bolıp ótti.

Onda respublikamızdıń qala hám rayonlarınan kelgen nuranıy analar, jámiyetlik turmıstıń barlıq tarawlarında belsene qatnasıp kiyatırǵan hayal-qızlar, túrli ministrlik hám mákemelerdiń wákilleri qatnastı.

Ilajdı Qaraqalpaqstan Respublikası Joqarǵı Keńesiniń Sociallıq-mádeniy rawajlanıw, jaslar siyasatı hám jámiyetlik birlespeler máseleleri komiteti baslıǵı Qurbaniyazov Dauıtbay Qalbaevich, Ózbekstan kásiplik awqamları Federaciyası baslıǵınıń orınbasarı, Qaraqalpaqstan Keńesi baslıǵı, senator U.A.Jalmenovlar ashıp, Prezidentimiz Sh.Mirziyoev hayal-qızlarımızdıń salamatlıǵı jolında hám jámiyette óz ornın belgilewinde baslamaları ilgeri súrilgenligi sonıń menen birge mámleketimizde hayal-qızlar ushın kóplegen imkaniyatlar jaratıp berilgen,olar qaysı tarawda bolsa da ózleriniń miynet súygishligi, talapshańlıǵı arqasında erler menen teń qádem taslap atırǵanlıǵı haqqında aytıp ótti. Sonıń menen birge hayal-qızlardıń mashqalaların sheshiw, olardı sociallıq qollap-quwatlaw maqsetinde «Hayallar dápteri» jolǵa qoyılıp hám bul baǵdarda hayal-qızlardıń bántligin támiyinlew, olardı kásip-ónerge hám isbilermenlikke úyretiw, hár tárepleme qollap-quwatlaw baǵdarında 1-basqıshta 24 mıń 511, 2-basqıshta 23 mıń 966 hámde 3-basqıshta 33 mıń 762 hayal-qızlardıń mashqalaları sheshilgenligi, sonıń menen birge, jıl basınan hayal-qızlardıń mashqalaları “máhállebay” úyrenip shıǵıp 55 mıń 021 hayal-qızlar «Hayallar dápteri»ne kiritilip, dizimleri qáliplestirilgenligi haqqında aytıp ótti.

Bayram keshesi dawamında Watanımızdıń rawajlanıwı jolında jemisli miynet etip atırǵan, jámiyetlik turmıstıń barlıq tarawlarında pidákerlik kórsetip kiyatırǵan bir qatar hayal-qızlarǵa hám nuranıy analarımızǵa Ózbekstan kásiplik awqamları Federaciyasınıń Qaraqalpaqstan Keńesi tárepinen Húrmet jarlıǵı hám estelik sawǵalar menen sıylıqlandı.

Ilaj dawamında koncert baǵdarlaması hámmege kóterińki keypiyat baǵıshladı.