Ҳәр жылы «Кәсиплик аўқамлары күни» мәмлекетимизде кеӊ түрде белгиленип, мийнет жәмәәтлеринде ҳәр қыйлы мазмундағы руўхый-ағартыўшылық, үгит-нәсиятлаў илажлары, спорт саўаландырыў жарыслары, викториналар, мәдений дем алыў илажлары  шөлкемлестирилип келинбекте.

Өзбекстан денсаўлықты сақлаў хызметкерлери кәсипилик аўқамы Республикалық Кеңесиниң “Жаңа Өзбекстан-жаңа кәсиплик аўқамлары” деген идеяны өзинде жәмлеген ис-илажлар бағдарламасы шеӊберинде Өзбекстан денсаўлықты сақлаў хызметкерлери кәсипилик аўқамы Республикалық Кеңеси баслығыныӊ орынбасары Г.Тохтаеваныӊ 2024-жыл 7-ноябрь күни Қарақалпақстан медицина институты мәжилислер залында Өзбекстанда кәсиплик аўқамы ҳәрекетиниӊ басланғанлығыныӊ 120 жыллығы алдынан ҳәм де 11-ноябрь – “Өзбекстан кәсиплик аўқамлары күни” байрамы мүнәсибети менен кәсиплик аўқамлары белсенделери менен «Ашықтан-ашық сәўбетлесиў» илажлары өткерилди.

«Ашықтан-ашық сәўбетлесиў»де Өзбекстан кәсиплик аўқамлары Федерациясыныӊ Қарақалпақстан кеӊеси баслығы У.Жалменов, Қарақалпақстан Республикасы денсаўлықты сақлаў министри орынбасары Т.Сарыбаев, Өзбекстан денсаўлықты сақлаў хызметкерлери кәсипилик аўқамыныӊ Қарақалпақстан Республикасы кеӊеси баслығы Л.Байбосынова ҳәм де кәсиплик аўқам белсендилери, кәсиплик аўқам ветеранлары, медицина хызметкерлери ҳәм студент-жаслар қатнасты.

Байрам мүнәсибети менен өткерилген «Ашықтан-ашық сәўбетлесиў»де денсаўлықты сақлаў хызметкерлери кәсиплик аўқамлары тәрепинен медицина мәкемелери хызметкерлериниӊ социал-экономикалық, ҳуқықый мәплерин ҳәм мийнетин қорғаўда алып барылып атырған жумыслар бойынша кеӊ түрде атап өтилип, өз-ара пикир алысыўлар болып өтти.

Байрам мүнәсибети менен өткерилген илажда кәсиплик аўқамларында нәтийжели жумыс ислеген бир қатар ветеранлар ҳәм де бүгинги күнде жемисли мийнет етип атырған кәсиплик аўқам белсендилери Өзбекстан денсаўлықты сақлаў хызметкерлери кәсипилик аўқамы Республикалық Кеңесиниӊ Алғыснама, Ҳүрмет жарлығы ҳәм естелик саўғалары менен сыйлықланды.

Сондай-ақ илажда бир қатар медицина хызметкерлерине байрам мүнәсибети менен денсаўлықларын беккемлеўлери ушын Өзбекстан кәсиплик аўқамлары Федерациясы қурамындағы санаторияларға бийпул жолламалар тапсырылды.