Hár jılı «Kásiplik awqamları kúni» mámleketimizde keń túrde belgilenip, miynet jámáátlerinde hár qıylı mazmundaǵı ruwxıy-aǵartıwshılıq, úgit-násiyatlaw ilajları, sport sawalandırıw jarısları, viktorinalar, mádeniy dem alıw ilajları  shólkemlestirilip kelinbekte.

Ózbekstan densawlıqtı saqlaw xızmetkerleri kásipilik awqamı Respublikalıq Keńesiniń “Jańa Ózbekstan-jańa kásiplik awqamları” degen ideyanı ózinde jámlegen is-ilajlar baǵdarlaması sheńberinde Ózbekstan densawlıqtı saqlaw xızmetkerleri kásipilik awqamı Respublikalıq Keńesi baslıǵınıń orınbasarı G.Toxtaevanıń 2024-jıl 7-noyabr kúni Qaraqalpaqstan medicina institutı májilisler zalında Ózbekstanda kásiplik awqamı háreketiniń baslanǵanlıǵınıń 120 jıllıǵı aldınan hám de 11-noyabr – “Ózbekstan kásiplik awqamları kúni” bayramı múnásibeti menen kásiplik awqamları belsendeleri menen «Ashıqtan-ashıq sáwbetlesiw» ilajları ótkerildi.

«Ashıqtan-ashıq sáwbetlesiw»de Ózbekstan kásiplik awqamları Federaciyasınıń Qaraqalpaqstan keńesi baslıǵı U.Jalmenov, Qaraqalpaqstan Respublikası densawlıqtı saqlaw ministri orınbasarı T.Sarıbaev, Ózbekstan densawlıqtı saqlaw xızmetkerleri kásipilik awqamınıń Qaraqalpaqstan Respublikası keńesi baslıǵı L.Baybosınova hám de kásiplik awqam belsendileri, kásiplik awqam veteranları, medicina xızmetkerleri hám student-jaslar qatnastı.

Bayram múnásibeti menen ótkerilgen «Ashıqtan-ashıq sáwbetlesiw»de densawlıqtı saqlaw xızmetkerleri kásiplik awqamları tárepinen medicina mákemeleri xızmetkerleriniń social-ekonomikalıq, huqıqıy máplerin hám miynetin qorǵawda alıp barılıp atırǵan jumıslar boyınsha keń túrde atap ótilip, óz-ara pikir alısıwlar bolıp ótti.

Bayram múnásibeti menen ótkerilgen ilajda kásiplik awqamlarında nátiyjeli jumıs islegen bir qatar veteranlar hám de búgingi kúnde jemisli miynet etip atırǵan kásiplik awqam belsendileri Ózbekstan densawlıqtı saqlaw xızmetkerleri kásipilik awqamı Respublikalıq Keńesiniń Alǵısnama, Húrmet jarlıǵı hám estelik sawǵaları menen sıylıqlandı.

Sonday-aq ilajda bir qatar medicina xızmetkerlerine bayram múnásibeti menen densawlıqların bekkemlewleri ushın Ózbekstan kásiplik awqamları Federaciyası quramındaǵı sanatoriyalarǵa biypul jollamalar tapsırıldı.