Nókis qalasındaǵı «Turan» balalar dem alıw orayında 2026-jıl jaz máwsiminde «Balalardıń jazǵı dem alısın shólkemlestiriwde birge islesiw, juwapkershilik hám qáwipsizlik – eń áhmietli baslı baǵdar» atamasında aymaqlıq oqıw seminarı bolıp ótti.

Bul seminar Ózbekstan Respublikası Prezidentiniń 2022-jıl 18-noyabrdegi PQ-427-sanlı qararı, Ministrler Kabinetiniń tiyisli protokolları hám Qaraqalpaqstan Respublikası aymaqlıq komissiyası tapsırmalarınıń orınlanıwın támiyinlew maqsetinde shólkemlestirildi.

Seminarǵa ministrlikler hám shólkemler, huqıq qorǵaw uyımları, densawlıqtı saqlaw, ayrıqsha jaǵdaylar, sanitariyalıq-epidemiologiyalıq xızmetler, jergilikli hákimlikler hám kásiplik awqam wákilleri, sonday-aq, dem alıw oraylarınıń direktorları hám bas tárbiyashılar qatnastı.

Ilaj dawamında balalardıń qáwipsiz dem alıwın shólkemlestiriw, dem alıw oraylarında sanitariya hám órt qáwipsizligi talaplarına ámel etiw, balalardı qáwipsiz tasıw, medicinalıq xızmetlerdi shólkemlestiriw, mádeniy-aǵartıwshılıq hám sport ilajların mazmunlı ótkeriw sonday-aq, “oromgohlar.uz” elektron platforması arqalı jollamalardı ashıq-aydın bólistiriw máseleleri dodalandı.

Seminar dawamında juwapker ministrlik hám shólkemler tárepinen máwsimge tayarlıq boyınsha ámelge asırılıp atırǵan jumıslar boyınsha bayanatlar tıńlandı hám ámeliy usınıslar berildi.

Sonday-aq, kem támiyinlengen shańaraqlardıń aǵla bahalarǵa oqıp atırǵan perzentlerin mámleket tárepinen qollap-quwatlaw, olardı dem alıw oraylarında biypul dem aldırıw hám sawalandırıw jumısların sistemalı shólkemlestiriw boyınsha da ayrıqsha wazıypalar belgilep alındı.

Seminar juwmaǵında barlıq aymaqlıq komissiyalar, ministrlikler hám shólkemlerge jazǵı sawalandırıw máwsimin qáwipsiz, mazmunlı hám joqarı dárejede shólkemlestiriw boyınsha tiyisli tapsırmalar berildi.