Nókis qalasında informacion texnologiyaları tarawına qızıǵıwshı jaslar ushın áhmiyetli bolǵan tanısıw ilaji bolıp ótti. Bul ilaj Ózbekstan kásiplik awqamları Federaciyasınıń Qaraqalpaqstan Keńesi tárepinen dúzildi hám jaslardı zamanagóy IT múmkinshilikleri menen jaqınnan tanıstırıwǵa qaratıldı. Ilaj sheńberinde qatnasıwshılar Nókis qalasında jaylasqan IT PARK iskerligi menen jaqınnan tanıstı. Olarǵa usı texnoparkte ámelge asırılıp atırǵan joybarlar, startaplar ushın jaratılǵan shárt-shárayatlar, rezidentler ushın berilip atırǵan jeńillikler hám de IT salasında kásiplik rawajlanıw múmkinshilikleri haqqında tolıq maǵlıwmatlar usınıldı. Sonıń menen birge, jaslar IT PARK infrastruktura, zamanagóy ofisler, oqıw orayları hám inkubaciya programmaları menen tanısıp, tarawda jetiskenliklerge erisken qánigeler menen ushırasıw imkaniyatına iye boldı.

Ilaj qatnasıwshıları bunday ushırasıwlar jaslardıń qızıǵıwshılıqların jáne de asırıw, olardı keleshekte básekige shıdamlı qánige retinde qáliplesiwinde zárúrli orın tutıwın aytıp ótti. Bunday ámeliy tanısıw ilajları jaslardı zamanagóy kásipke báǵdarlaw, olardıń bántligin támiyinlew hám de innovaciyalıq pikirlewdi rawajlandırıwda zárúrli áhmiyetke iye boladı.
Maǵlıwmat ushın: IT PARK — Ózbekstanda informaciya texnologiyaları salasın rawajlandırıw, startaplardı qollap-quwatlaw hám jas qánigeler ushın keń múmkinshilikler jaratıwǵa qaratılǵan innovciyalıq maydan esaplanadı.