Ózbekstan bilimlendiriw hám ilim xızmetkerleri kásiplik awqamı Nókis qalalıq bólimshesi tárepinen paytaxtımızdaǵı payızlı orınlarınıń birinde 11-noyabr – “Ózbekstan kásiplik awqamları kúni”, sonday-aq, Ózbekstan kásiplik awqamları háreketiniń 120 jıllıǵı múnásibeti menen saltanatlı bayram keshesi shólkemlestirildi.

Bayram keshesine Ózbekstan Kásiplik awqamları Federaciyası Qaraqalpaqstan Respublikası Keńesiniń baslıǵı Ulıqbek Abılaevich Jalmenov, Qaraqalpaqstan Respublikası Mektepke shekemgi hám mektep bilimlendiriw ministiriniń birinshi orınbasarı Aybek Umirbekovich Dawletbaev, Ózbekstan bilimlendiriw hám ilim xızmetkerleri kásiplik awqamı Respublikalıq keńesiniń Qaraqalpaqstan Respublikası boyınsha juwaplı shólkemlestiriwshisi Rustam Abduraximovich Abduraxmanov hám tarawlıq kásiplik awqamınıń belsendileri qatnastı.

Dáslep, ilajdı Ózbekstan Kásiplik awqamları Federaciyası Qaraqalpaqstan Respublikası Keńesiniń baslıǵı U.Jalmenov ashıp berdi.

Ol óziniń shıǵıp sóylegen sózinde kásiplik awqamlarınıń jámiyetimiz turmısındaǵı ornı, xızmetkerlerdiń máplerin qorǵawdaǵı juwapkershiligi hám insan qádiri ústin bolǵan Jańa Ózbekstannıń rawajlanıwında bul sistemanıń tutqan ornı haqqında sóz etti. Sonday-aq, barlıq kásiplik awqamı aǵzaların, miynet jámáátlerin 11-noyabr – «Ózbekstan kásiplik awqamları kúni» bayramı menen qızǵın qutlıqladı.

Bunnan soń, Qaraqalpaqstan Respublikası Mektepke shekemgi hám mektep bilimlendiriw ministiriniń birinshi orınbasarı A.Dawletbaev shıǵıp sóylep, mámleketimizde kásiplik awqamlarınıń 120 jıllıq tariyxında erisilgen jetiskenlikler, xızmetkerlerdiń huqıqıy, sociallıq hám ekonomikalıq máplerin qorǵawdaǵı jumıslarǵa hár tárepleme toqtap ótti. Ol iláj qatnasıwshıların bayram menen qutlıqlap, olardıń pidákerlik miynetine joqarı baha berdi. Sonday-aq, Ózbekstan bilimlendiriw hám ilim xızmetkerleri kásiplik awqamı Respublikalıq keńesiniń Qaraqalpaqstan Respublikası boyınsha juwaplı shólkemlestiriwshisi R.Abduraxmanov shıǵıp sóylep, taraw xızmetkerlerin bayram menen qızǵın qutlıqlap, aldaǵı jumıslarında tasqın tabıslar tiledi,

Bayram keshesi dawamında bir qatar taraw pidayıları Ózbekstan hám Qaraqalpaqstan Respublikaları «Xalıq bilimlendiriw aǵlası» kókirek belgisi, Ózbekstan Joqarı bilimlendiriw, ilim hám innovaciyalar ministrligi «Húrmet jarlıǵı», Ózbekstan Kásiplik awqamları Federaciyası Qaraqalpaqstan Respublikası Keńesiniń «Húrmet jarlıǵı», Nókis qalası hákimi «Húrmet jarlıǵı», Nókis qalalıq mektepke shekemgi hám mektep bilimlendiriw bóliminiń «Húrmet jarlıǵı» menen sıylıqlandı. Sonday-aq, bayramǵa arnap tarawlıq baslanǵısh kásiplik awqam shólkemi baslıqları arasında ótkerilgen «Eń belsendi baslanǵısh kásiplik awqam shólkemi baslıǵı» kórik-tańlawınıń jeńimpazları diplom hám estelik sawǵaları menen sıylıqlandı.

Bayram keshesinde qatnasıwshılarǵa kórkem-óner xızmetkerleri tárepinen koncert baǵdarlaması qoyıp berilip bayramǵa shıray baǵıshladı.

Ilaj juwmaǵında qatnasıwshılar elimizde miynetkesh insanlarǵa bolǵan húrmet, olardıń máplerin qorǵaw sistemasınıń barǵan sayın jetilisip atırǵanın atap ótip, kásiplik awqamları háreketi keleshekte de jámiyetlik turmısta áhmiyetli orın iyeleytuǵının atap ótti.