Miynetti qorǵaw tarawındaǵı múnásibetlerdi tártipke salıw maqsetinde 2016-jıl 22-centyabrde Ózbekstan Respublikasınıń ÓRQ-410-sanlı Nızamı, sonday-aq Ózbekstan Respublikası Ministrler Kabinetiniń 2025-jıl 24-dekabrde «Miynetti qorǵaw tarawına tiyisli ayırım rejelerdi tastıyıqlaw haqqında»ǵı 819-sanlı qararı qabıl etilgen edi.

Búgingi kúnde usı Nızam hám qararlardıń mazmun-mánisin úgit-násiyatlaw, bilimlendiriw mákemelerinde miynetti qorǵaw tarawındaǵı jumıslardı elede jedellestiriw maqsetinde Ózbekstan kásiplik awqamları Federaciyasınıń Qaraqalpaqstan keńesi hámde Ózbekstan bilimlendiriw hám ilim xızmetkerleri kásiplik awqamı Respublikalıq keńesi tárepinen usı jıldıń 10-aprel kúni «Bilimlendiriw tarawında miynetti qorǵawǵa baylanıslı mashqalalar» atamasında oqıw-seminar ótkerildi.

Bul oqıw-seminarda Ózbekstan kásiplik awqamları Federaciyasınıń Qaraqalpaqstan keńesi baslıǵı U.Jalmenov, Ózbekstan bilimlendiriw hám ilim xızmetkerleri kásiplik awqamı Respublikalıq keńesi miynetti qorǵaw tarawı boyınsha bas qánigesi D.Samarbekov, Qaraqalpaqstan Respublikası Kámbaǵallıqtı qısqartıw hám bántlik ministrliginiń Mámleketlik miynet inspekciyası inspektorı M.Seydullaev hámde Ózbekstan kásiplik awqamları Federaciyası Qaraqlapaqstan Keńesi Miynet texnik inspektorı B.Utepbergenovlar shıǵıp sóyledi.

Usı oqıw-seminarına Ózbekstan bilimlendiriw hám ilim xızmetkerleri kásiplik awqamı rayon(qala)lıq bólimshe keńesi baslıqları rayon(qala)lıq mektepke shekemgi hám mektep bilimlendiriw bólimlerinde miynetti qorǵaw boyınsha bekitilgen qánige, sonday-aq joqarı oqıw orınlarındaǵı miynetti qorǵaw xızmeti bólimi juwapker xızmetkerleri, Nókis qalasındaǵı bilimlendiriw mákemelerindegi baslanǵısh kásiplik awqamı komiteti baslıqları, miynetti qorǵaw boyınsha wákilleri qatnastı.

Seminardı ótkiziwden maqset bilimlendiriw mákemelerinde, Is beriwshiler hám xızmetkerler arasında miynetti qorǵawǵa tiyisli mashqalalar, olardıń sheshimleri, alda turǵan wazıypalar boyınsha keń túsinikler berildi. Sonday-aq, miynet jámáátlerinde miynetti qorǵaw máselesinde Is beriwshiniń minnetlemeleri, miynetti qorǵaw boyınsha qánige hám wákillerdiń wazıypaları boyınsha da maǵlıwmatlar berildi.

Oqıw-seminar sońında qatnasıwshılar óz-ara pikir almasıp, ózleriniń qızıqtırǵan sorawlarına juwaplar aldı.