Prezident qararı menen mámleket ekonomikasınıń strategiyalıq tarmaǵı retinde turizmdi jedel rawajlandırıw ushın qolaylı ekonomikalıq hám shólkemlestiriwshilik hám huqıqıy shárt-shárayatlar jaratılıp, aymaqlardıń úlken turizm potencialınan jáne de tolıq hám nátiyjeli paydalanıw múmkinshiligi jaratıldı. Nátiyjede elimizde turizm salasın túpten reformalaw procesi baslandı. Hámmege málim, turizm salasındaǵı ózgerisler milliy ekonomikanı rawajlandırıwdıń strategiyalıq baǵdarlarınan biri bolıp, ol aymaqlardıń jedel rawajlanıwı ushın imkániyat jaratadı.

26-noyabr kúni Ózbekstan kásiplik awqamları Federatsiyasinıń Qaraqalpaqstan Keńesinde áyne máseleler tuwralı jıynalıs ótkerildi. Jıynalısta Ózbekstan kásiplik awqamları Federaciyasi janındaǵı “Kasaba sayr” sıńar kárxanası direktorı Xidirov Tolqın Uzakovich hám de tarawlardıń Qaraqalpaqstan Respublikası Keńesleri, qala hám rayonlıq keńesleri, barlıq tarawlardaǵı iri shólkemlerdegi kásiplik awqam komitetleri baslıqları qatnastı.

Jıynalıstı Ózbekstan kásiplik awqamları Federaciyasınıń Qaraqalpaqstan Keńesi baslıǵı Ulıqbek Jalmenov ashıp berdi. Sonnan keyin kárxana direktorı Xidirov Tolqın Uzakovich sózge shıqtı.

“2017-jıldan búginge shekem Ózbekstanda Prezident Shavkat Mirziyoev basshılıǵında turizm salasında iri reformalar ámelge asırılmaqta. Analizlerge kóre, 2015-jılda bizde bir waqıttiń ózinde respublika boyınsha bir kúnniń ózinde 10 mıń 200 dana sayaxatshı qabıl etilgen. Házirgi kúnge kelip bul kórsetkish 70 mıńnan astı. Bul bolsa turistler aǵımı barǵan sayın artıp baratırǵanın kórsetedi. Aytıw kerek, turizm dúnyada eń aktual hám kerekli taraw. Eger dúnya boyınsha nátiyjelerege qaraytın bolsaq, Franciya bul boyınsha jetekshi. Bul mámleketke jılına 1 millionnan zıyat sayaxatshı keledi, Amerika ekinshi, Ispaniya da artta qalıp atırǵanı joq. Ózbekstan usı tarawda óz jolın taptı. Turizm infrastrukturası rawajlanıp atır. Bunnan tısqarı ishki turizm, ekoturizm, mádeniy, zıyarat, gastronomyalıq hám basqa kóplegen turizmlar jedel rawajlanıp barıp atır”,-dep keltirdi Tolqın Uzakovich óz sózinde.

Sonıń menen birge qatnasıwshılar tárepinen berilgen sorawlar hám usınıslar hár tárepleme dodalanıp olarǵa tolıq juwaplar alındı.