Mámleketimizde hayal-qızlardı hár tárepleme qollap-quwatlaw, olardıń sociallıq-siyasiy belsendiligin asırıw, bántligin támiyinlew, járdemge mútáj hayal-qızlardıń mashqalaların sheshiw boyınsha keń kólemli jumıslar ámelge asrılıp kelinbekte hám bul islerdi 2023-jılı da dawam ettiriw maqset etilgen.

Ózbekstan kásiplik awqamları Federaciyasınıń Qaraqalpaqstan Keńesi májilisler zalında Qaraqalpaqstan Respublikasında «Hayallar dápteri» menen islesiw sistemasınıń 4-basqıshın shólkemlestiriw hám ámelge asırıw boyınsha Ózbekstan kásiplik awqamları Federaciyası baslıǵı orınbasarı Q.Qırǵızaliev, Qaraqalpaqstan Respublikası Ministrler Keńesi baslıǵı orınbasarı, shańaraq hám hayal-qızlar komiteti baslıǵı M.Axmedova hám kásiplik awqamlarınan rayon(qala)larǵa biriktirilgen wákiller qatnasıwında májilis bolıp ótti. Jıynalıstı Senator, Ózbekstan kásiplik awqamları Federaciyası baslıǵı orınbasarı Qaraqalpaqstan Keńesi baslıǵı U.Jalmenov ashıp berdi hám alıp bardı.

Májiliste Q.Qırǵızaliev hayal-qızlar mashqalaların sistemalı túrde sheshiw, olardı sociallıq qollap-quwatlaw boyınsha orınlanıwı tiyis bolǵan gezektegi wazıypalar haqqında toqtalıp, islenip atırǵan hár bir is qalıs hám áshkára alıp barılıwın, shetki aymaqlarda jasap atırǵan járdemge mútáj hayal-qızlardıń itibardan shette qalmawı tiyisligin ayırıqsha atap ótti.

Sonday-aq, Qaraqalpaqstan Respublikası Ministrler Keńesi baslıǵı orınbasarı, shańaraq hám hayal-qızlar komiteti baslıǵı M.Axmedova hám basqalar sóge shıǵıp, «Hayallar dápteri» menen islesiw sistemasınıń 4-basqıshında nelerge itibar qaratıw haqqında jáne bir márte toqtalıp ótti, pikir hám usınıslar ortaǵa taslanıp, wazıypalar belgilep alındı.