Mamlakatimizda xotin-qizlarni har tomonlama qo’llab-quvvatlash, ularning ijtimoiy-siyosiy faolligini oshirish, bandligini ta’minlash, ehtiyojmand xotin-qizlarning muammolarini hal etish borasida keng ko’lamli ishlar amalga oshirilib kelinmoqda va bu kabi ezgu ishlar 2023 yilda ham davom etishi shubhasiz. Demakkim, har bir islohot va har qanday qaror avvalo inson manfaatiga xizmat qilayotgani bilan ahamiyatlidir.

O’zbekiston kasaba uyushmalari Federatsiyasining Qoraqalpog’iston Kengashi majlislar zalida Qoraqalpog’iston Respublikasida «Ayollar daftari» bilan ishlash tizimining 4-bosqichini tashkil etish va amalga oshirish yuzasidan O’zbekiston kasaba uyushmalari Federatsiyasi raisi o’rinbosari Q.Qirg’izaliev, Qoraqalpog’iston Respublikasi Vazirlar Kengashi raisi o’rinbosari, oila va xotin-qizlar qo’mitasi raisi M.Ahmedova va kasaba uyushmalaridan tuman (shahar)larga biriktirilgan vakillar ishtirokida yig’ilish bo’lib o’tdi. Yig’ilishni Senator, O’zbekiston kasaba uyushmalari Federatsiyasi raisi o’rinbosari, Qoraqalpog’iston Kengashi raisi U.Jalmenov ochib berdi va olib bordi.

Yig’ilishda Q.Qirg’izaliev xotin qizlar muammolarini tizimli ravishda hal etish,ularni ijtimoiy qo’llab-quvvatlash buyicha amalga oshiriladigan galdagi vazifalar xususida to’xtalar ekan, qilinayotgan har bir ish shaffof va xolislik asosida olib borilishiga alohida to’xtaldilar. Ta’kidladilarki, «…biz joylarga borib, chekka ovul bo’ladimi, tuman yoki shahar bo’ladimi, joylarga borib, aholi yashash sharoitini o’z ko’zimiz bilan ko’rgan holda ish olib borsak, shundagina maqsadimizga etgan bo’lamiz».

Shuningdek, Qoraqalpog’iston Respublikasi Vazirlar Kengashi raisi o’rinbosari, oila va xotin-qizlar qo’mitasi raisi M.Ahmedova, va boshqalar so’zga chiqib, «Ayollar daftari» bilan ishlash tizimining 4-bosqichida nimalarga e’tibor qaratish lozimligiga yana bir bor to’xtalib o’tishdi, fikr-mulohazalar o’rtaga tashlanib, vazifalar belgilab olindi.