11-oktyabr kúni Dúnya júzilik “Múnásip miynet kúni”ne baǵıshlanıp Ózbekstan kásiplik awqamları Federaciyasınıń Qaraqalpaqstan Keńesi májilisler zalında ministrlikler, basqarmalar, komitetler, mámleketlik emes kommerciyalıq emes shólkemler wákilleri hám kásiplik awqamı belsendileri, ǵalaba xabar quralları wákilleri qatnasıwında Dóńgelek stol sáwbeti bolıp ótti.

Dógerek sáwbetinde “Múnásip miynet – múnásip turmıs tiykarı”, “Jumıs beriwshilerdiń sociallıq juwapkershiligin  asırıw faktorları”, “Jańa jumıs orınların jaratıw, xalıqtı jumıs penen támiyinlewde ámelge asırılıp atırǵan jumıslar haqqında”, “Kárxana, mákeme hámde shólkemlerde óndiris penen baylanıslı baxıtsız hádiyselerdiń aldın alıw haqqında”, “2024-jılǵı paxta jıyın-terimi máwsiminde terimshiler ushın shárt sharayatlar jaratıw, máwsim dawamında balalar miyneti hám májbúriy miynetten paydalanbaw boyınsha milliy manitoring toparı tárepinen alıp barılıp atırǵan jumıslar haqqında”  bayanatlar tıńlandı.

Shıǵıp sóylewshiler óz sózlerinde múnásip miynet túsinigi adamlarǵa múnásip turmıs keshiriwleri ushın beriletuǵın múmkinshilik ekenligin, ózine bántlik, huqıq, qorǵaw hám sáwbet haqqındaǵı tiykarǵı tórt baǵdardı qamtıytuǵınlıǵın, múnásip miynet túsinigi arqalı xızmetkerlerdiń sociallıq qorǵalıw kólemin keńeytiriw, mámleketlik organlar, jumıs beriwshiler hám xızmetkerler arasındaǵı múnásibetler, sociallıq-ekonomikalıq máselelerdi sheshiwdegi sociallıq sóylesiwler alıp barıw kózde tutılatuǵınlıǵın, sosnday-aq mámleketimiz tárepinen múnásip miynet tendenciyalarınıń tolıq támiyinleniwine ayrıqsha itibar qaratılıp, miynet adamlarınıń sociallıq qorǵalıwın kúsheytiwde sistemalı jumıslardıń alıp barılıp atırǵanlıǵın, atap aytqanda Ózbekistan Respublikası tárepinen Xalıqaralıq Miynet Shólkeminiń 24 Konvenciyası hám 1 protokolı ratifikaciya etilip, olardıń orınlanıwın támiyinlewde kompleks is-ilajlar izbe-iz ámelge asırılıp, mámleketimizde miynet, bántlik hám xalıqtıń sociallıq qorǵalıwı salasındaǵı zárúr nızamshılıq bazasınıń jaratılǵanlıǵı hám onıń udayı túrde jetilistirilip barılıwın atap ótti.

Dógerek sáwbeti  dawamında óz-ara soraw-juwaplar, pikir alısıwlar bolıp ótti. Sonday-aq  Dógerek sáwbeti qatnasıwıshlar ózleri qızıqtırǵan sorawlarǵa bayanatshılar tárepinen tolıq juwaplar aldı.