Qaraqalpaqstan Respublikasi Prokuraturası hám Ózbekstan kásiplik awqamları Federaciyasınıń Qaraqalpaqstan Keńesi tárepinen Ózbekstan Respublikası Ministrler Kabinetiniń 11.02.2005-jıldaǵı «Xızmetkerlerge olardıń miynet wazıypaların orınlawı menen baylanıslı halda jaraqatlanıwı, kásip keselliklerine shalınıwı yaki salamatlıǵınıń boasa túrde zıyanlanıwı sebepli keltirilgen zıyandı tólew qaǵıydaları haqqında»ǵı 60-sanlı qarar talaplarınıń orınlanıwı úyrenilip, Qaraqalpaqstan Respublikası aymaǵında jumıs alıp barıp atırǵan kárxana, shólkem hám máqemelerde miynet wazıypaların orınlawı menen baylanıslı halda jaraqat alǵan jámi 216 miynet mayıplarınıń zıyan tólemleri boyınsha toplanǵan hújjetleri úyrenip shıǵıldı.

Kárxanalarda óndiris penen baylanıslı baxıtsız hádiyselerge ushırap, házirgi kúnde miynet mayıbı bolıp qalǵan jámi 216 miynetkeshler bar bolıp, usı miynetkeshler menen júz bergen baxıtsız hádiyseler boyınsha N-1 dalalatnaması rásmiylestirilgen. Baxıtsız hádiyseler aqıbetinde puqaralarǵa Shıpakerlik-sociallıq ekspert komissiyası (ShSEK) tárepinen payızlarda miynet etiw uqıplılıǵın joyıtqanlıǵı haqqında juwmaqlar berilgen bolsada, jámi 30 miynetkeshlerge jumıs beriwshiler tárepinen tóleniwi lazım bolǵan hár aylıq zıyan tólemleri tólenbesten, Ózbekstan Respublikası Ministrler Kabinetiniń 11.02.2005-jıldaǵı 60-sanlı qarorı talapları buzılıwına jol qoyılǵan.

Usı qarardıń 59-bántinde “zıyan ushın juwapker bolǵan jumıs beriwshiniń ayıbı menen  óz waqtındaa alınbaǵan zıyandı qaplaw swmması birde-bir múddat menen shegaralanbaǵan halda ótken dáwir ushın tólenedi” dep belgilengen.

Ózbekstan Respublikası Miynet Kodeksiniń 324-statyasına tiykar, xızmetkerdiń salamatlıǵına zıyan keltirilgenligi múnásebeti menen joytılǵan is haqınıń ornın qaplaw ushın ámelge asırılatuǵın aylıq tólemler muǵdarı miynette mayıp bolǵan jábirlengenlerge – mayıplıǵı bolǵan shaxslarǵa jetkizilgen zıyannıń ornın qaplaw swmması nızamshılıqta belgilengen miynetke haq tólew eń kem muǵdarınıń eliw payızınan kem bolmaslıǵı haqqında belgilep qoyılǵan.

Alıp barılǵan úyreniw jumıslarınıń juwmaǵında kárxana, shólkem hámde mákemeler tárepinen 30 puqaraǵa jámi 794 919 131 (jeti júz toqsan tórt million toǵız júz on toǵız mıń bir júz otız bir) swm muǵdarında zıyan tólemleri tólenbegenligi anıqlandı.

Usı hádiyselerde juwapker bolǵan jumıs beriwshilerden puqaralardıń paydasına usı kúnge shekem tólenbey kiyatırǵan zıyan tólemlerin óndiriw, aldaǵı waqıtta hár ay ushın miynetke haq tólew muǵdarınıń eliw payızınan kem bolmaǵan muǵdarda zıyan tólemlerin tólep barılıwı hámde miynetke hám tólewdiń eńg kem muǵdarınıń asırılǵan swmmasına say ráwishte usı zıyan tólemleri kóbeytirilip barılıwı boyınsha Qaraqalpaqstan Respublikası aymaǵındaǵı rayonlarara puqaralıq isleri boyınsha sudlarına dawa arzalar kiritildi.

Sonday-aq,  2024-jıldıń 3 ayı dawamında (ótken dáwirler ushın) óndiris penen baylanıslı baxıtsız hádiysege ushırap, júz bergen baxısız hádiyseler aqıbetinde miynet etiw uqıplılıǵın joyıtqanlıǵı hámde baǵıwshısın joytıqanlıǵı ushın olardıń shańaraq aǵzalarına tóleniwi lazım bolǵan zıyan tólemlerin óndiriw boyınsha Ózbekstan kásiplik awqamları Federaciyasınıń Qaraqalpaqstan Keńesi tárepinen puqaralıq isleri boıynsha rayonlarara sudlarına dawa arzalar kiritilip, usı dawa arzalardıń juwmaǵında sud qararları menen – xızmetkerlerdiń ham olardıń shańaraq aǵzalarınıń paydasına jámi 707 774 254 (jeti júz jeti million jeti júz jetpis tórt mıń eki júz eliw tórt) swm muǵdarında zıyag tólemleri óndirip berildi.