Ózbekstan Den-sawlıqtı saqlaw xızmetkerleri kásiplik awqamınıń Respublikalıq keńesi miynet inspekciyasınıń jıllıq is-jobasına muwapıq miynetti qorǵaw nızam hám nızam astı hújjetlerine ámel etiliwi hámde Qaraqalpaqstan Respublikası Densawlıqtı saqlaw ministrligi hám Ózbekstan Densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesi arasında 2021-2023-jıllar ushın qabıl etilgen Tarawlıq kelisim talaplarınıń orınlanıwın jámáátlik qadaǵalawdı ámelge asırıw maqsetinde Qaraqalpaqstan Respublikası boyınsha miynet texnik inspektorı tárepinen bir qatar medicina mákemeleri xızmetkerlerine 2019-2023-jıllarda berilgen jıllıq miynet dem alısı buyrıqları úyrenildi.

Úyreniwler dawamında Tarawlıq kelisim 3.7-punktinde kórsetilgen jumıs orınları attestaciyası boyınsha juwmaqta belgilengen qosımsha miynet dem alısları xızmetkerlerge berilmey kelgeni anıqlandı.

Bunıń nátiyjesinde:

Respublikalıq oba profilaktika orayı Qaraqalpaqstan filialınıń 103 xızmetkerine 400 million 895 mıń swm,
Respublikalıq qánigelestirilgen onkologiya hám radiologiya ilimiy-ámeliy medicina orayı Qaraqalpaqstan filialınıń 105 xızmetkerine 91 million 986 mıń swm,
Respublikalıq qánigelestirilgen dermatovenerologiya hám kosmetologiya ilimiy-ámeliy medicina orayı Qaraqalpaqstan filialınıń 122 xızmetkerine 191 million 318 mıń swm,
S.Sultanov atındaǵı Respublikalıq Ftiziatriya hám pulmonologiya orayınıń 306 xızmetkerine 164 million 641 mıń swm,
Respublikalıq patologiyalıq anatomiya byurosı 9 xızmetkerine 66 million 502 mıń swm,
Respublikalıq qıstawlı medicinalıq járdem ilimiy orayınıń Qaraqalpaqstan Respublikası filialınıń 189 xızmetkerine 162 million 904 mıń swm,
Qaraqalpaqstan Respublikası Den-sawlıqtı saqlaw ministrligi Respublikalıq qan quyıw stanciyası 80 xızmetkerine 90 million 44 mıń 165 swm jumıs beriwshiler tárepinen qayta esaplap tólep berildi.

2023-jıl basınan usı kúnge shekem Ózbekstan Den-sawlıqtı saqlaw xızmetkerleri kásiplik awqamınıń Respublikalıq keńesiniń Qaraqalpaqstan Respublikası boyınsha miynet texnik inspektorı P.Z.Abdiyazov kórsetpeleri tiykarında Qaraqalpaqstan Respublikası Densawlıqtı saqlaw tarawındaǵı jámi 1214 xızmetkerdiń mápin gózlep olarǵa tólenbey kelgen 1 milliard 168 million 290 mıń swm jumıs beriwshiler tárepinen qayta esaplap tólep berildi.