1997-jıldan baslap Xalıqaralıq Miynet Shólkemi tárepinen 12-iyun “Pútkil dúnya júzilik balalar miynetine qarsı gúresiw kúni” dep járiyalanǵan.

Usı sáne múnásibeti menen Ózbekstan kásiplik awqamları Federaciyasınıń Qaraqalpaqstan Keńesi tárepinen Taqıyatas rayonındaǵı «Aydın jol» dem alıw orayında “Balalar miynetin toqtatıw boyınsha óz minnetlememizdi orınlayıq!” súreni astında ilaj ótkerilip, bunda dem alıwshı balalar menen Keńestiń miynetkeshlerdiń sociallıq-ekonomikalıq máplerin qorǵaw bólimi meńgeriwshisi P.Toremuratov, jetekshi qánigesi E.Utepbergenov, Balalardıń dem alıwın hám sawallandırıwın shólkemlestiriw Departamentiniń Qaraqalpaqstan basqarması qánigesi M.Qarlıbaev, Ózbekstan kásiplik awqamları Federaciyasınıń Dene tárbiya hám sport basqarması Qaraqalpaqstan Respublikası boyınsha juwaplı shólkemlestiriwshisi S.Sharipov, Ózbekstan hám Qaraqalpaqstan Respublikası sporttıń karate túri boyınsha chempionları A.Kósherbaev, T.Ashirbekova hám basqalar qatnastı.

Ilajda Keńestiń miynetkeshlerdiń sociallıq-ekonomikalıq máplerin qorǵaw bólimi qánigeleri tárepinen 12 – iyun – «Pútkil dúnya júzilik balalar miynetine qarsı gúresiw kúni» haqqında keń túrde aytıp ótip, májbúriy miynet sonıń ishinde balalar miynetine jol qoymawda alıp barılǵan jumıslar tiykarında bir qatar unamlı nátiyjeliklerge erisilgenligin, sonıń ishinde balalar miyneti toqtatılǵanlıǵın ayrıqsha atap ótti.

Bunnan soń, A.Kósherbaev, T.Ashirbekovalar ózleriniń usı tabıslarına erisiwinde mámleketimizde bárshe sharayatlardıń jaratılǵanlıǵın, bunnan jaslarımız durıs paydalana biliwi, birinshi gezekte jaqsı oqıwı, udayı túrde sport penen shuǵıllanıwı, bos waqıtların durıs shólkemlestiriwi kerekligin hám bul baǵdarlaǵı jumıslarda ata-analar keń jámiyetshilik penen birgelikte jumıs alıp barıw zárúrligin aytıp ótti.

12-iyun – “Pútkil dúnya júzilik balalar miynetine qarsı gúresiw kúni”ne baǵıshlanıp balalar arasında súwret salıw tańlawları, sporttıń shashka, shaxmat, stol tennisi túrlerinen jarıslar ótkerilip jeńimpazlarǵa Ózbekstan kásiplik awqamları Federaciyasınıń Qaraqalpaqstan Keńesi tárepinen balalarǵa Xalıq aralıq miynet shólkemi hám Ózbekstan kásiplik awqamları Federaciyasınıń logatipleri tusirilgen futbolka, kepka, hám diplomlar menen sıylıqlandı.

“Balalar miynetin toqtatıw boyınsha óz minnetlememizdi orınlayıq!” súrendi astında ilajlar hám Ellikqala rayonındaǵı «Aral balaları», Tórtkúl rayonındaǵı «Oq kabutar» balalar dem alıw oraylarında ótkerildi.