Mámleketimizde jaratılǵan kúshli sociallıq qorǵaw nátiyjeleri  tiyqarında Ózbekstan kásiplik awqamları tárepinen xalıqtıń járdemge mútáj qatlamların, imkaniyatı sheklengen shaxslardı, ásirese, ósip kiyatırǵan jas áwlatdı qorǵaw hámde ertengi kúnimiz iyelerine mánzilli sociallıq qorǵawın kúsheytiw maqsetinde anıq ilajlar ámelge asırılmaqta.

11-noyabr – Ózbekstan kásiplik awqamları kúni múnásibeti menen Ózbekstan kásiplik awqamları Federaciyasınıń Qaraqalpaqstan Keńesi tárepinen 2023-jıl 2-10 noyabr kúnleri aralıǵında «Jańa turmıs ushın, Jańa Ózbekstan ushın!» ideyasın ózinde jámlegen qayır-saqawat ilajları ótkerilmekte.

Usı jıldıń 8-noyabr kúni Ózbekstan kásiplik awqamları Federaciyasınıń Qaraqalpaqstan Keńesi xızmetkerleri hámde belsendeleri Nókis qalasında jaylasqan «Imkon» reabilitaciya orayına iye mámleketlik kóp tarmaqlı qánigelestirilgen mektepke shekemgi bilimlendiriw shólkeminde bolıp,  usı jerde tárbiyalanıp atırǵan balalar halınan xabar aldı.

Ilajda Senator, Ózbekstan kásiplik awqamları Federaciyası baslıǵı orınbasarı, Ózbekstan kásiplik awqamları Federaciyasınıń Qaraqalpaqstan Keńesi baslıǵı U.Jalmenov qatnasıp, usı orayda tárbiyalaniwshılar hámde onda islewshi xızmetkerlerdiń hal-jaǵdayları menen tanısıp olar menen sáwbetlesti.

Oray 2019-jıl mart ayında shólkemlestirilgen bolıp búgingi kúnde 121 tárbiyalaniwshılarǵa 10 toparda  jumıs alıp barılmaqta.

Orayda islewshi aldınǵı qatardaǵı xızmetkerlerge Ózbekstan kásiplik awqamları Federaciyasınıń Qaraqalpaqstan Keńesiniń Húrmet jarlıǵı hámde tárbiyalaniwshı balalarǵa baxalı sawǵalar berildi.

Usınday ilajlar Ózbekstan kásiplik awqamları Federaciyası buwındaǵı barlıq shólkemler tárepinen Ózbekstan Respublikasınıń bárshe walayatlarında ótkerilmekte.