Ózbekstan Respublikası Prezidenti Sh.M.Mirziyoevtıń 2020-jıl 2-oktyabr kúni Qaraqalpaqstan Respublikasına saparı dawamında hámde Qaraqalpaqstan Respublikası Joqarǵı Keńesiniń gezeksiz segizinshi sessiyasında berilgen tapsırmalar hám 2020-jıl 8-oktyabrdegi “Qaraqalpaqstan Respublikasın sociallıq-ekonomikalıq rawajlandırıwda ushırasıp atırǵan mashqalalar hám olardı saplastırıw boyınsha ámelge asırılıwı tiyis bolǵan ilajlar haqqında”ǵı 73-sanlı májilis protokolının 103-bántine muwapıq, Ózbekstan kásiplik awqamları tárepinen Bozataw rayonında 2021-jılı sanatoriya qurıw boyınsha wazıypa belgilengen edi.

Bozataw rayonı hákiminiń 2020-jıl 13-noyabrde “Sanatoriya obektin qurıw ushın jer maydanın ajıratıp beriw haqqında”ǵı 11-979-sanlı qararı qabıl etildi hám Bozataw rayonı «Erkindárya» awıl puqaralar jıyını aymaǵında sanatoriya qurıw ushın jer orın ajıratıldı.

Bozataw rayonı “Erkindárya” awıl puqaralar jıyını aymaǵında  sanatoriyanıń irgetası 2023-jılı 10-mart kúni Qaraqalpaqstan Respublikası Joqarǵı Keńesi Baslıǵı Orınbaev Amanbay Tleubaevich, Ózbekstan kásiplik awqamları Federaciyasi Keńesi Baslıǵınıń orınbasarı Qirǵizaliev Qobiljon, Ózbekstan kásiplik awqamları Federaciyasi Qaraqalpaqstan Keńesi baslıǵı, senator Jalmenov Ulıqbek Abılaevich, Ózbekstan kásiplik awqamları Federaciyasi Sanator-Kurortlar basqarması baslıǵı Axmedov Anvar Mixmonovich hám Bozataw rayonı hákimi Allaniyazov Kamal Amanbaevich tárepinen qalandı.

Sanatoriydıń irgetasın qalaw saltanatında Qaraqalpaqstan Respublikası Ministrler Keńesi baslıǵı orınbasarı Daniyarov Abat Saparbaevich, Ózbekstan kásiplik awqamları Federaciyasınıń kapital qurılıs basqarması baslıǵı Fozilov Haydar Inamovich, orınbasarı Tursunov Hamid Shamshievich, “Kasaba loyiha” JShJ direktorı Ibraximov Qayrat Abdumuminovich, “Kasaba qurilish” JShJ direktoriUsmonov Xusan Abduvaxabovich,Ózbekstan kásiplik awqamları Federaciyasınıń Qaraqalpaqstan Keńesi baslıǵı orınbasarı Daniyarov Muratbay Quwanıshbaevichlar hám rayon zıyalıları, nuraniyler hám awıl puqaraları qatnastı.